Mańǵystaý oblysynda kún 45 gradýsqa deıin ysýy yqtımal

AQTAÝ. QazAqparat – 12-16 shilde aralyǵynda Mańǵystaý oblysynyń basym bóliginde kún 43-45 gradýsqa deıin ysýy yqtımal. Osyǵan baılanysty oblystyq tótenshe jaǵdaılar departamenti eskertý jarııalady, dep habarlaıdy QazAqparat tilshisi.

«Óńirde 12 shildeden bastap, bes kúndeı 43-45 gradýsqa deıin qatty ystyq bolady dep boljanyp otyr. Tabıǵı órtterdiń týyndaý qaýpin tómendetý maqsatynda azamattardan órt qaýipsizdigi talaptaryn saqtaýdy suraımyz. Atap aıtqanda, janyp turǵan sirińke men temeki tuqylyn tastamaý kerek. Sondaı-aq, orman jáne dala alqaptarynda ot jaǵýǵa bolmaıdy. Tabıǵat aıasynda demalǵannan keıin shyny ydystardy jınap alý qajet, óıtkeni kún sáýlesi áınekke shaǵylysyp, qurǵaq shópti tutandyrýy múmkin. Janǵysh qoqystardy shyǵarý jáne eldi mekender aýmaǵyn jınaý, qurǵaq ósimdikterden tazartý, mıneraldandyrylǵan jolaqtardy qalpyna keltirý kerek», - deıdi oblystyq TJD MÓBB bas mamany Arman Teńel.

Sondaı-aq, maman órt týyndaǵan jaǵdaıda dereý 101 nemese 112 baılanys nómirleri boıynsha habarlaý qajettigin eske salady.

Aıta ketsek, 2020-2022 jyldarda oblysta orman jáne dala órti tirkelmegen.

Sondaı-aq, buǵan deıin habarlaǵanymyzdaı, Nur-Sultanda jáne toǵyz oblysta aýa raıyna baılanysty eskertý jarııalandy.