Mańǵystaý oblysynda koronavırýs boıynsha epıdemıologııalyq jaǵdaı turaqty
Ǵazız Nadýevtiń aıtýynsha, Mańǵystaý oblysy reprodýktıvti kórsetkish boıynsha jasyl aımaqta.
«Koronavırýstan jalpy kóz jumǵan- 74 naýqas, emdelip shyqqandar – 3329 (97,4%). Statsıonarda 6 naýqas em qabyldap jatsa, shaǵymy joq 9 naýqas úı karantıninde. Oblysta barlyǵy koronavırýstyń shaǵymy bar túrin juqtyrǵan 1169 naýqas tirkeldi, onyń ishinde Aqtaý qalasy – 488, Jańaózen - 157, Túpqaraǵan -40, Qaraqııa – 75, Mańǵystaý – 42, Munaıly – 171, Beıneý – 198 boldy», - dedi Ǵazız Nadýev.
Oblysta 17 tamyzdan bastap 24 monıtorıng toby quryldy. Búgingi tańda monıtorıng tobymen 808 reıd júrgizilip, 2202 nysan tekserildi. Reıd barysynda 141 nysanda buzýshylyqtar anyqtalyp, 113 ( 16 jeke kásipker, 96 jeke tulǵa, 1 zańdy tulǵa) ákimshilik hattama (9 mln. 431310 tg.) toltyryldy.
Baspasóz konferentsııasyna Aqtaý qalalyq №2 emhanasynyń dırektory Jaras Baıǵojaev qatysty. Onyń málimetinshe, medıtsınalyq mekemege 80 283 turǵyn tirkelgen. Pandemııaǵa baılanysty, tıisti sharalar qolǵa alyndy. Emhanada balalarǵa, júkti áıelderge, eresekterge arnalǵan bólek fıltrler 08:00-den 17:00-ge deıin apta boıy úzilissiz jumys isteıdi.
«Emhanamyzǵa kelýshiler ǵımaratqa kirmeı turyp áýeli dene qyzýyn ólshetedi. Eger ol adamnan tumaý, JRVI, sýyq tııýdiń belgileri baıqalsa ol birden fıltrge kiredi. Sodan soń dárigerdiń qaraýynan ótýi qajet. Jaǵdaıy nashar bolsa, naýqas fıltrdegi arnaıy oqshaýlaý bólmesinde (ızolıator) jedel járdemdi kútip otyrady. Nemese ambýlatorııalyq emge (úı jaǵdaıynda em qabyldaý) jiberiledi», - dedi Jaras Baıǵojaev.