Mańǵystaý oblysynda qolóner sheberleriniń halyqaralyq forýmy ótti
Mańǵystaý oblysy ákiminiń baspasóz qyzmetinen málim etkendeı, basty maqsat – qazaqtyń ulttyq kodyn saqtaýdyń kepili retinde qolónerdi jandandyrý jáne etnotýrızmdi damytý.
Alańda qazaqtyń erteden baspanasy sanalǵan kıiz úıler tigildi. Oblystyń barlyq aýdan, qalalarynan kelgen qolónershiler qoldan jasalǵan toqyma, quraq syndy ulttyq buıymdardy, zergerlik zattar men taǵamdardy jármeńkege shyǵardy.
Forýmda spıkerler «Qolónershilik jáne tabys» taqyrybynda pikir almasty. Óńirdegi qolónerdiń qazirgi jaǵdaıy, etnotýrızmniń bolashaǵy sóz boldy. Salany damytý boıynsha usynystaryn ortaǵa saldy.
«Árıne, zaman talabyna sáıkes bul murany jastarǵa jańa baǵytta usynyp, ony damytýdy kásipkerlikpen ushtastyrý qajet. Osy tusta etnotýrızmdi qolǵa alyp, tek qana qolónershilikti úırenip qana qoımaı, odan ári ol arqyly tabys tabýǵa da qoldaý bildirýimiz kerek», - dedi Mańǵystaý oblysynyń ákimi Nurlan Noǵaev forýmda sóılegen sózinde.
Forýmǵa «JICA» Japon halyqaralyq yntymaqtastyq agenttiginiń sarapshysy, Qyrǵyz Respýblıkasyndaǵy «Bir aýyl – bir ónim» jobasynyń bas konsýltanty Akıhısa Haragýchı, Qazaqstan qolónershiler odaǵynyń prezıdenti Aıjan Bekqulova, Mańǵystaý oblysy qolónershiler odaǵynyń prezıdenti Áýes Saǵynaeva, Mańǵystaý oblysy isker áıelder keńesiniń tóraıymy Sáýle Salıhova, sondaı-aq oblystyń qolónershileri, aqsaqaldar men úkimettik emes uıymdardyń ókilderi qatysty.
