Mańǵystaý oblysynda ken ornyndaǵy órt 4 kúnnen beri jalyndap jatyr

AQTAÝ.QazAqparat - 9 maýsym kúni Mańǵystaý oblysyndaǵy «Bozashy Munaı» JShS-nyń «Ońtústik Qaraturyn» munaı-gaz ken ornynda tutanǵan órt áli aýyzdyqtalǵan joq. Bul týraly óńirlik Tótenshe jaǵdaılar departamentiniń baspasóz qyzmetinen málim etti, dep habarlaıdy QazAqparat tilshisi.

«13 maýsym saǵat 08:30-daǵy jaǵdaı boıynsha Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby bólimshesiniń kúshimen jasaqtalǵan lınııa boıynsha 302 tekshe metr eritindi tógildi (kraterge - red.).

Jumys jalǵasyp jatyr.

Mańǵystaý oblysy Tótenshe jaǵdaılar departamentiniń jıyntyq jasaǵynyń kúshteri men quraldary apat bolǵan jerde kezekshilik rejıminde jumys júrgizýde», - delingen málimette.

Іs-qımyldyń odan arǵy algorıtmin ázirleý maqsatynda búgin keńes ótkizý josparlanǵan.

Eske salaıyq, 9 maýsym saǵat 09:00-de Mańǵystaý oblysy Tótenshe jaǵdaılar departamentiniń daǵdarys jaǵdaılary basqarmasyna «Bozashy Munaı» JShS-nyń «Ońtústik Qaraturyn» munaı-gaz ken ornyndaǵy órt týraly aqparat túsken bolatyn.