Mańǵystaý oblysynda ken ornynda jumysshy qaza tapty

AQTAÝ. QazAqparat – Mańǵystaý oblysyndaǵy Jetibaı ken ornynda gazben dánekerleýshi qaıtys boldy. Taǵy bir jumysshy aýrýhanaǵa tústi. Bul týraly «Mańǵystaýmunaıgaz» AQ baspasóz qyzmeti málim etti, dep habarlaıdy QazAqparat tilshisi.

Oqıǵa 29 sáýir saǵat 16:42 shamasynda «Jetibaımunaıgaz» óndiristik basqarmasynyń №5613/28 uńǵymasynda «Velıkaıa Stena» BK JShS (Burǵylaý brıgadasy HDES - №56) aýmaǵynda bolǵan. Jazataıym oqıǵanyń mán-jaıy men sebepteri anyqtalyp jatyr.

«Montajdaý jumystary kezinde gazben dánekerleýshi, Qazaqstan azamaty oqıǵa ornynda qaıtys boldy. Burǵylaý qondyrǵysynyń sheberi, Qytaı azamaty basynan jaraqat alyp, aýyldyq aýrýhanaǵa jetkizildi. Oqıǵa ornyna jedel túrde Mańǵystaý aýdanynyń polıtsııa qyzmetkerleri keldi. Jazataıym oqıǵanyń mán-jaıyn anyqtaý maqsatynda quqyq qorǵaý organdarynyń qyzmetkerleri sotqa deıingi tergeý júrgizedi», - delingen baspasóz habarlamasynda.

Sondaı-aq, «Velıkaıa Stena» BK JShS jazataıym oqıǵa týraly jedel túrde Mańǵystaý oblysynyń Eńbek basqarmasyna, osy jazataıym oqıǵa boıynsha arnaıy tergeý júrgizý úshin Mańǵystaý oblysy ındýstrııalyq damý jáne ónerkásiptik qaýipsizdik komıtetiniń departamentine habarlama jiberilgen. Qazirgi ýaqytta Mańǵystaý oblysynyń Eńbek basqarmasy basshylyq etetin komıssııa qurylyp jatyr.

Jazataıym oqıǵany tergeýdi «Mańǵystaýmunaıgaz» AQ basshylyǵy jeke baqylaýǵa aldy, tergeý belgilengen merzimde júrgizilip, kináli adamdar QR zańnamasyna sáıkes jazalanady.