Mańǵystaý oblysynda ǵaryshtan baqylaý kezinde 148 zańsyz qoqys orny anyqtaldy
Mańǵystaý oblysynda qoqys tógetin 8 polıgon bar. Alaıda jańadan salynǵan shaǵyn aýdandar men teńiz jaǵalaýynda qoqys máselesi alańdatarlyq.
Mańǵystaý oblystyq ekologııa departamentiniń basshysy Rýslan Tókenovtyń aıtýynsha, «Ǵarysh sapary» AQ-nyń aqparaty boıynsha búginde óńirde 148 stıhııalyq qoqys tógetin oryn paıda bolǵan, onyń ishinde Aqtaý qalasynda - 84, Munaıly aýdanynda – 48 jáne Túpqaraǵan aýdanynda - 16 qoqys tógetin oryn bar. Jergilikti atqarýshy organdar ıesiz qaldyq úıindilerin joıýdy 10 tamyzǵa deıin aıaqtaýdy josparlap otyr.
Jyl basynan qaldyqty zańsyz tókken tulǵalarǵa qatysty 450 ákimshilik materıal toltyrylǵan. Kóbine qurylys nysandarynda zań buzýshylyq jıi oryn alǵan. Atap aıtqanda Aqtaý qalasyndaǵy 16, 17, 18, 19, 20-shaǵynaýdandarynda qurylys nysandary salynyp jatyr, sol jerlerde qoqysty shashyp ketý jıi kezdesedi.
Mamandar QR Ákimshilik quqyq buzýshylyq týraly kodeksiniń 505-babynda osyndaı áreket úshin zańdy nemese jeke tulǵalarǵa jaýapkershilik qarastyrylǵanyn eske saldy.
«Budan bylaı bizdiń departament mamandary múddeli memlekettik organdarmen, onyń ishinde ákimdiktermen, turǵyn-úı kommýnaldyq sharýashylyǵy mekemelerimen, úkimettik emes uıymdary jáne buqaralyq aqparat quraldarymen birlesip, teńiz jaǵalaýyndaǵy demalys oryndarynda reıd júrgizedi. Onyń maqsaty – adamdardy ekologııany qorǵaý jónindegi saýatyn arttyrý, tabıǵatqa uqypty qarap, qorshaǵan ortaǵa qamqorlyq jasaý, Kaspıı teńiziniń bıoalýantúrliligin saqtaý», - deıdi óńirdiń bas ekology Rýslan Tókenov.
Al, Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekov bolsa, ýákiletti organdar zań aıasynda áreket etetinin jáne másele tek aıyppul salýmen sheshilmeıdi degen pikir aıtty. Sondyqtan da, túsindirý jumystaryna kóbirek kóńil bólý mańyzdy ekenin aıtady.
«Bizdiń maqsatymyz barlyǵyn jazaǵa tartý emes, kerisinshe qorshaǵan ortaǵa degen súıispenshiligin arttyrý bolyp tabylady. Máselen, teńiz jaǵalaýynda kóbine jastar júredi, olardyń tarapynan zańsyz áreketter bolsa anyqtaý qıyn emes. Sebebi teńiz jaǵalaýynda birneshe jerde beınekamera ornatylǵan, jaıaý patrýl kezekshilikke shyǵady jáne kináli tulǵalarǵa tıisti jazasyn alýda. Bul rette ata-analar tarapynan tárbıege kóbirek kóńil bólinse deımiz», - deıdi ol.