Mańǵystaý oblysynda elektr energııasynyń jańa tarıfi bekitildi
Mańǵystaý oblystyq tabıǵı monopolııalardy retteý departamenti 23 tamyzda «Mańǵystaý Jaryq» JShS-ne Aqtaý qalasy jáne Munaıly aýdanynyń tutynýshylary úshin 1 kVt saǵatqa elektr energııasynyń qunyn ózgertýge kelisim berdi:
- turmystyq tutynýshylar (turǵyndar) úshin QQS-syz – 17,40 teńge;
- zańdy tulǵalar men jeke kásipkerler úshin QQS-syz – 21,38 teńge;
- memlekettik bıýdjetten qarjylandyrylatyn uıymdar úshin QQS-syz – 68,68 teńge.
Sondaı-aq, Túpqaraǵan, Qaraqııa, Beıneý jáne Mańǵystaý aýdandarynyń tutynýshylary úshin elektr energııasynyń quny 1 kVt saǵaty:
- turmystyq tutynýshylar (turǵyndar) úshin QQS-syz – 17,40 teńge;
- zańdy tulǵalar men jeke kásipkerler úshin QQS-syz – 25,77 teńge;
- memlekettik bıýdjetten qarjylandyrylatyn uıymdar úshin QQS-syz – 41,60 teńge.
Tarıftiń kóterilý sebebi – «MAEK-Qazatomónerkásip» JShS-niń elektr energııasyn óndirýge shekti tarıfiniń kóterilýi. Sondyqtan da, «Mańǵystaý Jaryq» JShS májbúrli túrde tarıfti kóterip otyr.
«2019 jyldan bastap biz Mańǵystaý oblysynyń tórt aýdanynda (Túpqaraǵan, Mańǵystaý, Qaraqııa jáne Beıneý aýdandary), 2021 jyldan bastap Jańaózende tutynýshylardyń túrli toptaryn energııamen jabdyqtaý qyzmetin júzege asyra bastadyq, al 2022 jyldyń qańtarynan bastap Aqtaý jáne Munaıly aýdanynyń tutynýshylaryna qyzmet kórsete bastadyq. Aqtaýda tórt jyl boıy halyq úshin tarıf toqtatyldy. Bizge deıin basqa energııamen jabdyqtaýshy uıym jumys istegeni barshaǵa málim, al biz qala ákimshiliginiń ótinishi boıynsha aldyńǵy kompanııanyń ornyna keldik. Osy aılardyń barlyǵy Aqtaý jáne Munaıly aýdanynyń tutynýshylary úshin shyǵyndy tarıfke qaramastan, biz óz jumysymyzdy ýaqtyly oryndaýdy jáne jetkizýshilermen, sonyń ishinde «MAEK-Qazatomónerkásip» JShS-men esep aıyrysýdy jalǵastyrdyq», - dedi kompanııa dırektory Ermek Dáýletpaqov.
