Mańǵystaý oblysynda eki PTR-zerthana ashylady
Kommýnıkatsııa ortalyǵynda ótken brıfıngide oblystyq Densaýlyq saqtaý basqarmasy basshysynyń orynbasary Lázzat Esenǵalıeva qazan aıynyń sońyna deıin Jańaózen qalasy men Beıneý aýylynda PTR-zerthanalar ashylatynyn málim etti.
«Qazirgi ýaqytta bizdiń oblysta PTR-testileýmen aınalysatyn 5 zerthana bar. Biri memlekettik, qalǵany jeke menshikte. Barlyǵy qosa alǵanda, bul zerthanalar bir táýlikte 3700 PTR-zertteý júrgizýge qaýqarly» - deıdi L.Esenǵalıeva.
Sondaı-aq, óńirde qurylysy bastalǵan modýldik statsıonar 25 qazanda qoldanysqa berilmek.
«Infektsııalyq aýrýhananyń qoldanysqa daıyndyǵy 95 protsent dep baǵalanýda. Bul statsıonardyń ashylýy 25 qazanǵa josparlanǵan. Ǵımaratqa KT, ÝZI, rentgen apparattary qoıylǵan. Budan ózge, bıylǵy jyldyń sońyna deıin 100 oryndyq qalalyq kópbeıindi aýrýhana ashylady dep kútilip otyr. Koronavırýstyń boljamdy kelesi tolqynyn eńserýge 2700 medıtsınalyq qyzmetker daıyndyqtan ótkizildi. Olardyń tizimi bekitilgen. Ár apta saıyn basqa aımaqtardaǵy JOO-lardyń professorlyq-oqytýshylyq quramymen onlaın-sabaqtar ótkizildi», - dedi óńirdiń Densaýlyq saqtaý basqarmasy basshysynyń orynbasary.
Pandemııanyń yqtımal kelesi tolqynyna daıyndyq aıasynda aımaq ákiminiń maquldanǵan is-sharalar jospary túzildi. Oǵan sáıkes, belgilengen jumystar atqarylyp jatyr.
«Іndettiń endigi tolqynyna tosqaýyl qoıý maqsatynda Mańǵystaý óńirine 18 qazan kúni eki jyljymaly medıtsınalyq keshen jetkizilgen. Olar shalǵaı eldi meken turǵyndaryna qyzmet kórsetedi. Taǵy 20 reanımobıl kóligin bólý jumystary áli de bolsa jalǵasyp jatyr. Bul mashınalar jaqyn kúnderi Mańǵystaý, Túpqaraǵan jáne Beıneý aýdandaryna jiberiledi.
Qoımalarda birrettik jáne kóp ret qoldanylatyn medkostıýmder, qolǵaptar, betperdeler, medhalattar men kózildirikter sekildi jeke qorǵanys quraldarynyń 2 aıǵa jetetin qory quryldy. Sonymen qatar 3 mln betperde satyp alyndy. Ahýal nasharlaǵan jaǵdaıda olar jergilikti dárihanalarǵa jetkiziledi», - dedi ol.
Mańǵystaý oblysynda búginge deıin jalpy 3372 adamnan koronavırýs ınfektsııasy anyqtaldy. Onyń 3282-si aýrýdan jazylyp turdy. Infektsııalyq statsıonarlarda 54 adam em qabyldap jatyr. Onyń ekeýinen PTR-testileý qorytyndysy oń nátıje kórsetti. Olardyń biri - perzenthanada jatqan júkti áıel, ekinshisi - oblystyq balalar aýrýhanasyna jatqyzylǵan sábı. Qalǵan 52 adamǵa koronavırýstyq pnevmonııa dıagnozy qoıylǵan.
Aımaq boıynsha 215 ınfektsııalyq tósek-oryn men 9 statsıonar bar. Budan bólek, taǵy 11 statsıonar men 1835 kereýet qoldanysqa ázir. Barlyq tehnıka, múlikpen qamtylǵan bul oryndar rezervte tur.
Buǵan deıin Qaraǵandy metsınınalyq ýnıversıtetiniń professorlyq-oqytýshylar toby óńirge kelip ketkeni málim. Olar KVI-ge qatysty emdeý protokoldaryn túzýge belsene atsalysty. Sáıkesinshe, Aqtaý men Jańaózen qalalarynda dárigerler úshin biliktilik arttyrý semınarlary ótkizildi.
Aıta keteıik, KVI-diń kelesi tolqynyna ázirlik aıasynda 70 myń adam tumaýǵa qarsy ekpe alady dep josparlanǵan. Búginde 90 protsentine ekpe salyndy. Olardyń basym kópshiligin júkti áıelder, jıi aýyratyn tulǵalar men esepte turǵan azamattar quraıdy.