Mańǵystaý oblysynda eki aptada 16 oqýshydan koronavırýs tabyldy

AQTAÝ. QazAqparat - 15 men 30 naýryz aralyǵynda Mańǵystaý obylsy boıynsha mektep oqýshylarynyń arasynda koronavırýs ınfektsııasyn juqtyrǵan 16 jaǵdaı, muǵalimder arasynda 6 jaǵdaı tirkeldi, dep habarlaıdy QazAqparat tilshisi.

Bul týraly Qoǵamdyq kommýnıkatsııa ortalyǵynda ótken brıfıngte Mańǵystaý oblysy sanıtarııalyq- epıdemıologııalyq departamentiniń basshysy Ǵazız Nadýev málim etti.

Onyń aıtýynsha, mektep oqýshylary arasynda Aqtaý qalasy boıynsha №13, 20, 6, 12, 21, 23, 5, 6, 15 mektepte jáne Nazarbaev zııatkerlik mektebinde, Munaıly aýdany boıynsha Qyzyltóbe lıtseıinen 2 jaǵdaı anyqtaldy.

Onyń ishinde 9 oqýshy - offlaın, 7-eýi - onlaın rejımde oqıdy.

«Anyqtalǵan 16 oqýshynyń 15-i úıdegi qarym-qatynas arqyly, 1 oqýshy jedel otaǵa daıyndyq barysynda anyqtalyp otyr. Aýyrǵan oqýshylardyń barlyǵynyń shaǵymy joq. Qazirgi ýaqytta 16 oqýshynyń synyptary úı karantınine alyndy»,-dedi Ǵazız Nadýev.

Budan bólek Mańǵystaý oblysy sanıtarııalyq-epıdemıologııalyq departamentiniń basshysy epıdemıologııalyq ahýaldyń qazirgi deńgeıine toqtaldy.

«Infektsııa juqtyrǵandardyń 65% tyǵyz qarym-qatynasta bolǵan oshaqta baıqalyp otyr. Bul degenimiz - adamdar epıdemııa oshaǵynda saqtyq sharalaryn qadaǵalamaı, aýyryp jatyr degen sóz. Qazirgi ýaqytta aýrýdyń salystyrmaly kórsetkishi Aqtaý qalasynda ósim berip otyr. Aýdandardyń ishinde eń tómen kórsetkish Beıneý men Qaraqııa aýdanynda bolyp otyr»,-dedi Ǵazız Nadýev.

Mańǵystaý oblysynda sońǵy reprodýktıvti kórsetkish - 0,77.