Mańǵystaý oblysynda dzıýdodan respýblıkalyq týrnır bastaldy

AQTAÝ. QazAqparat - Qaraqııa aýdanynda dzıýdo kúresinen «Halyq batyry Er Shabaı Qonysuly» atyndaǵy IV respýblıkalyq týrnır bastaldy, dep habarlaıdy QazAqparat tilshisi.

Qaraqııa aýdany ákimdiginiń baspasóz qyzmetinen málim etkendeı, Quryq aýylynda uıymdastyrylǵan jarys eki kúnge jalǵasady.

«Týrnırde 2009-2010, 2011-2012 jyly týǵan jasóspirim uldar men qyzdar baq synaıdy. Saıysqa Almaty, Taraz, Túrkistan, Taldyqorǵan, Aqtóbe, Atyraý qalalarynan, Mańǵystaý oblysynyń Aqtaý, Jańaózen qalalarynan jáne Túpqaraǵan, Beıneý, Mańǵystaý, Munaıly, Qaraqııa aýdandarynan, sondaı-aq Qyrǵyzstan elinen kelgen komandalar, barlyǵy 500-ge jýyq sportshy qatysyp jatyr», - delingen baspasóz málimetinde.

Dástúrli respýblıkalyq týrnır osymen tórtinshi márte uıymdastyrylyp otyr.

Foto: sports.kz