Mańǵystaý oblysynda bıznesti qoldaýǵa 1 mlrd teńgeden astam qarajat bólindi

«Bıznestiń jol kartasy 2020» bıznesti qoldaý men damytýdyń biryńǵaı baǵdarlamasy aıasynda Mańǵystaý oblysy úshin 2017 jylǵa 1 110,3 mln teńge somasynda qarajat bólindi. Jyl ishinde osy baǵdarlama sheńberinde 15,2 mlrd teńgeniń 208 jobasy qoldaý tapty. Onyń ishinde, paıyzdyq mólsherlemeni sýbsıdııalaý boıynsha - 15,1 mlrd teńgeniń 152 jobasy, kepildendirý boıynsha 101,8 mln teńgeniń 56 joba maquldandy. Nátıjesinde 4036 jumys orny saqtalyp, oblys boıynsha qosymsha 1403 jańa jumys orny quryldy.

2017 jyldyń 1 jeltoqsanyndaǵy jaǵdaı boıynsha ekinshi deńgeıdegi bankter shaǵyn bıznes sýbektilerine 25,1 mlrd teńge kóleminde kredıttik resýrstar bóldi. Bul - ótken jyldyń osyndaı kezeńimen salystyrǵanda 1,3 ese kóp.

Halyqqa mıkrokredıt berý «Damý» kásipkerlikti qoldaý qory» AQ, «Aýyl sharýashylyǵyn qarjylaı qoldaý qory» AQ, «Agrarlyq nesıe korporatsııasy» aktsıonerlik qoǵamynyń Atyraý fılıaly, «Atameken» mıkroqarjy uıymy» JShS, «Mańǵystaý» kredıttik seriktestigi arqyly júzege asyrylýda.

Barlyq mıkrokredıt uıymdary men «Damý» kásipkerlikti qoldaý qory» AQ 2017 jylda 1,3 mlrd. teńge jalpy somasyna 278 mıkrokredıt berip, nátıjesinde 632 jańa jumys orny quryldy.

«Aýyl kásipkerlerin qoldaýdyń taǵy bir quraly - shaǵyn nesıeler berý. Jyl basynda osy maqsatqa bıýdjetten 490 mln teńge qarjy qarastyryldy. Shaǵyn nesıege kásipkerler tarapynan suranystyń kóptigi eskerile otyryp, respýblıkalyq bıýdjetke qosymsha taǵy da 1,5 mlrd teńgege ótinim berilip, qoldaý tapty. Bul ótken jylǵy kórsetkishten 4 ese kóp. Aýyldyq jerde shaǵyn jáne orta bıznesti damytý, eńbek naryǵyn transformatsııalaý maqsatynda biz ishki rezervter esebinen «DAMÝ» qorymen birlesip qarjylandyrý kólemi 2,7 mlrd teńge bolatyn «Nur kapıtal» jobasyn iske qostyq. Jańa joba boıynsha aýyl kásipkerleri 1% mólsherlememen nesıe ala alady», - dedi oblys ákimi Eraly Toǵjanov.

Jergilikti bıýdjetten 2017 jyly ósimdik sharýashylyǵy óniminiń shyǵymdylyǵy men sapasyn kóterýdi sýbsıdııalaýǵa - 58,5 mln teńge, asyl tuqymdy mal sharýashylyǵyn damytýdy, mal sharýashylyǵy ónimin óndirýdi jáne ótkizýdi qoldaýǵa - 50,8 mln teńge bólindi.

Mańǵystaý oblysynyń Kásipkerlikti qoldaý kartasynyń aıasynda 2017 jyly 70,7 mlrd teńgege jańadan 419 turaqty jumys orny qurylǵan 5 joba paıdalanýǵa berildi.

Olar:

1) Elektr qalqan jabdyǵyn óndirý jáne 6-10-35 kV qýatty transformatorlardy jóndeý, «Aqtaý transformator zaýyty» JShS;
2) «Aqtaý Keramzıt» JShS-niń Keramzıt tasyn óndiretin zaýytynyń qurylysy («Aqtaý teńiz porty» AEA aýmaǵynda);

3) Quryq portynda parom keshenin salý jáne ámbebap júk-jolaýshylar paromdaryn paıdalaný, «Qazaqstan temir joly» UK» AQ (2-kezeń);

4) «Shyny-plastıkalyq qubyrlar zaýyty» JShS-niń shyny-plastıkalyq qubyrlar men fıtıngter óndiretin 3-tsehynyń qurylysy;

5) Daıyn ónimdi shyǵarý boıynsha óndiristik qýatty arttyrýmen mıneraldy tyńaıtqyshtar óndiretin zaýytty jańǵyrtý (2-kezeń), «QazAzot» JShS.

Investıtsııalar tartý jáne oblystyń ınvestıtsııalyq ahýalyn jaqsartý maqsatynda, 2017 jylǵy sáýirde Aqtaý qalasynda otandyq ınvestorlardyń, ekonomıkanyń túrli salalarynan kelgen bıznesmenderdiń qatysýymen «Oblystyń ınvestıtsııalyq áleýetin damytý» atty kezdesý bolyp ótti.

Mamyr aıynda Dúnıejúzilik bank, Azııa Damý Banki, «Fın Bıznes Haby» jáne Eýropa Qaıta qurý jáne damý banki ókilderiniń qatysýymen «Halyqaralyq uıymdar úshin Mańǵystaý oblysyn damytýdaǵy múmkindikter» taqyrybynda dóńgelek ústel ótkizildi.

2017 jylǵy shildede «KAZAKH INVEST» UK» AQ-nyń óńirlik ókildigimen birlesip halyqaralyq kólik-logıstıkalyq forým ótkizilip, oǵan Reseıdiń, Ázerbaıjannyń, Túrkııanyń, Qytaıdyń, Grýzııanyń, AQSh-tyń, Ulybrıtanııanyń, Italııanyń ókilderi qatysty. Kólik-logıstıkalyq áleýetti damytý máseleleri, Kaspıı tranzıt dáliziniń biryńǵaı tarıfi talqylandy. Forým qorytyndysynda Mańǵystaý oblysynyń ákimdigi men «A+A Group of Companies», «EnerMech» kompanııalarynyń arasynda yntymaqtastyq týraly úshjaqty memorandýmǵa, Aqtaý jáne Anaklııa porttary arasynda eki jaqty memorandýmǵa qol qoıyldy.