Mańǵystaý oblysynda birqatar iri óndiris oryndary toqtap tur – Memleket basshysy
«Oblysta sońǵy bes jyl boıy birqatar iri óndiris oryndary toqtap tur. Bul jaǵdaı jumyssyz qalǵan azamattar arasynda narazylyq týǵyzǵanyn jaqsy túsinemin. Úkimet osy óndiristerdi jandandyrý úshin tıimdi sharalardy shuǵyl túrde qabyldaýǵa tıis. Qajet bolsa, jańa ónim shyǵarý úshin naryqtyń suranysyna saı beıimdeý joldaryn qarastyrý kerek. Sonymen birge, básekege qabiletti jańa kásiporyndar ashqan jón. 2023-2026 jyldary 29 jobany júzege asyrýdy josparlap otyrmyz. Sonyń nátıjesinde 3 myń turaqty jumys orny ashylady. Úkimetke jáne ákimdikke barlyq jobalardyń ýaqytyly aıaqtalýyn qamtamasyz etýdi tapsyramyn», - dedi Memleket basshysy.
Qasym-Jomart Toqaev Mańǵystaý oblysyndaǵy kásipkerlikti damytý máselesine de toqtaldy.
«Oblysta kásipkerlikti damytý úshin de zor múmkindikter bar. Sońǵy jyldary shaǵyn jáne orta bıznestiń ishki óńirlik ónimdegi úlesi 32 paıyzǵa jetti. Osy salada 140 myńǵa jýyq adam jumyspen qamtylǵan. Óńdeý ónerkásibi, týrızm, saýda, sondaı-aq bilim berý jáne medıtsına salasynda kásipkerler sany artyp kele jatqany qýantady. ıAǵnı, oblys ekonomıkasy ártaraptana bastady deýge bolady. Aımaqtaǵy shaǵyn jáne orta bıznesti damytýǵa «Men – kásipkermin» jobasy tyń serpin bereri anyq. Sondaı-aq, «Kásipkerlikti damytý» ulttyq jobasy aıasynda osy aımaqtyń shaǵyn jáne orta bıznes ókilderine kómek kórsetilýge tıis. Jalpy, ákimdik Úkimettiń qoldaýymen bıznesti yntalandyratyn jańa sharalar ázirleýi kerek», - dedi QR Prezıdenti.