Mańǵystaý oblysynda bankomat kartalarynan aqsha urlaǵan topqa qatysty sot úkimi shyqty
ASTANA. QazAqparat - Aqtaý qalalyq sotynda qylmystyq topqa qatysty úkim shyǵaryldy. Alty aıyptalýshynyń arasynda ózge eldiń azamattary da bar. Olarǵa bank kartalaryn jasaý arqyly ózge adamdardyń qarjylaryn ıemdendi degen aıyp taǵylǵan, dep habarlaıdy «Qazaqstan - Aqtaý» telearnasy.
Bul top osyndaı kúdikpen 2015 jyldyń 15 jeltoqsanynda ustalǵan bolatyn. Qylmystyq top urlyq jasaý úshin bankomattarǵa skımmer qurylǵysyn ornatqan. Sol arqyly bankomat qyzmetin paıdalanýshylardyń aqparatyn oqyp otyrýǵa qol jetkizedi. Munan soń 40 jalǵan karta jasap shyǵarady da, tórt adamnyń 152 myń teńgesin qoldy etip úlgeredi.
«Mańǵystaý oblysy Іshki ister departamenti uıymdasqan qylmysqa qarsy kúres basqarmasy qyzmetkerleri men ulttyq qaýipsizdik komıtetiniń Mańǵystaý oblysy boıynsha departamenti qyzmetkerleriniń birlesken sharalarynyń nátıjesinde Aqtaý qalasy aýmaǵynda Qazaqstan Respýblıkasy, Ázerbaıjan, Grýzııa, Moldova elderi azamattarynan quralǵan turaqty uıymdasqan toptyń is-áreketiniń joly kesildi», - deıdi Mańǵystaý oblystyq ІІD baspasóz qyzmetiniń ókili Ardaqhan Náýbet.
Sot úkimi boıynsha alty aıyptalýshynyń biri 424 myń teńge aıyppul tóleýmen qutylady. Al qalǵan beseýine tórt jyldan segiz jylǵa deıin bas bastandyǵynan aıyrý týraly jaza kesildi.
