Mańǵystaý oblysynda «Balyqshylar» saıabaǵy ashyldy

BAÝTIN. QazAqparat – Mańǵystaý oblysy Túpqaraǵan aýdany, Baýtın aýylyna qarasty Atash eldi mekeninde «Balyqshylar» demalys orny paıdalanýǵa berildi, dep habarlaıdy QazAqparat.

Túpqaraǵan aýdany ákimdiginiń baspasóz qyzmetinen málim etkendeı, joba el Táýelsizdiginiń 30 jyldyǵyna oraı júzege asyrylǵan.

Jalpy aýmaǵy 2400 sharshy metr bolatyn saıabaqta kireberis arka, sport alańy, balalar oıyn alańy, avtoturaq pen shatyrly oryndyqtar bar. Demalys ornynyń qaq ortasynda bıiktigi 3,80 metr bolatyn «Balyqshylar» eskertkishi ornatylǵan. Músinniń avtory mańǵystaýlyq kólóner sheberi Bolatbek Salaev. Eskertkish demeýshilerdiń qarajaty esebinen turǵyzyldy.

Saltanatty jıynda aýyl aqsaqaly Qoılyǵul Atshybaev pen ardager balyqshy, Túpqaraǵan aýdanynyń qurmetti azamaty Táýirhan Qanjanov eskertkishti ashyp, aýyl turǵyndaryn Táýelsizdiktiń 30 jyldyǵymen quttyqtady.

«Qýanyshymyz eselenip tur. Óıtkeni bul eskertkish bizdiń ótken tarıhymyzǵa eleýli eńbegi sińgen ardagerlerge degen qurmettiń belgisi dep bilemin. Elimizdiń ulyq merekesi qarsańynda boı kótergen eskertkish pen demalys orny aýylymyzdyń kórkine kórik qosyp, ajaryn asha túskendeı», - dedi Táýirhan Qanjanov.