Mańǵystaý oblysynda balyqshydan AK-74 markaly avtomat tárkilendi
ASTANA. 10 shilde. QazAqparat - Mańǵystaý oblystyq ІІD Uıymdasqan qylmysqa qarsy kúres basqarmasynyń qyzmetkerleri Fort-Shevchenko qalasynda 35 jastaǵy er azamatty qolǵa túsirip, odan AK-74 markaly avtomatty tárkilep aldy.
Bul týraly búgin QR ІІM resmı ókili Nurdildá Oraz málim etti.
«Birneshe kún buryn polıtsııaǵa atalǵan azamattyń bekire tuqymdas balyqtardy óndirý boıynsha zańsyz shuǵyldanyp júrgendigi jóninde jedel aqparat kelip túsken. Bul aqparatty tekserý maqsatynda prokýratýra qyzmetkerlerimen, ulttyq qaýipsizdik jáne QR ІІM Áskerı-tergeý basqarmasymen birlese otyryp, oqıǵa ornynan jedel-tergeý toby joldandy. Úıge jalǵasyp turǵan ǵımarattyń qosymsha bóligin tekserý nátıjesinde hımııalyq qorǵanýǵa arnalǵan kostıýmniń shulyǵynan AK-74 avtomaty, 5,45 mm kalıbrli 75 patrony bar úsh oqsaýyt, sondaı-aq 5 aý salý qaby tabyldy»,-dedi resmı ókil.
Sonymen qatar kórshiles turǵan qosymsha ǵımaratty tekserý kezinde 200 keliden asa bekire tuqymdas balyq saqtalyp turǵan 2 muzdatqysh kamera tabyldy.
Sharany ótkizý kezinde úı turǵyndarynyń, týystar men kórshiler tarapynan polıtsııaǵa belsendi kúsh kórsetildi. Qarý ıesi kúsh kórsetýdiń nátıjesinde oqıǵa ornynan qashyp ketken. Úsh polıtsııa qyzmetkeri túrli dene jaraqattaryn aldy.
Qashqyndy quryqtaý maqsatynda «Tosqaýyl» atty arnaıy jospar ázirlenip, polıtsııanyń kúzet oryndary uıymdastyryldy. «Qazirgi tańda kúdikti qolǵa túsip, qarý tárkilenip alyndy. Qarýdy zańsyz saqtaý men bılik ókilderine qarsy kúsh kórsetý faktileri boıynsha qylmystyq is qozǵaldy»,-dedi N. Oraz.
