Mańǵystaý oblysynda avtomobıl joldarynyń 95%-y sapaly
«Jalpy, Mańǵystaý oblysynda avtomobıl joldarynyń 95%-y sapaly dep aıtýǵa bolady. Osy baǵytta respýblıka boıynsha alda kele jatyrmyz. Buryn Ulttyq jol sapasy ortalyǵynan resmı hatqa jaýap alý qıyn bolatyn. Qazirgi ýaqytta oblys turǵyndary jol sapasyn tekserý boıynsha ýákiletti organ ekenimizdi biledi», dedi «Ulttyq jol aktıvteri sapasy ortalyǵy» respýblıkalyq-memlekettik kásiporny Mańǵystaý bólimshesiniń dırektory Eltaı Taıalıev.
2021 jyldyń basynan oblys joldarynda 416 baqylaý reıdteri júrgizildi. Ortalyq sarapshylary 52 nysanǵa baryp tekserý ótkizdi. Qańtardan qarashaǵa deıin 1809 synama alyndy. Olardyń tek 200-den astamy sapasyz bolyp shyqty. Osy jol ýchaskelerinde jóndeý jumystaryn júrgizýge jaýapty merdiger uıymdarǵa qyzmettik hat jazyldy. Nátıjesinde barlyq kemshilikter túzetildi.
Eltaı Taıalıevtiń aıtýynsha, Ulttyq jol sapasy ortalyǵy qyzmetkerleriniń mindetine júk kóligin zańmen ruqsat etilgen shekten asyrmaı tasymaldaýdy baqylaý kiredi. Bul baǵyttaǵy jumys kóliktik baqylaý ınspektsııasymen birlesip júrgiziledi. Osy jyldyń jaz aılarynda 2 myńnan astam júk kóligi tekserildi. Zańda belgilengen tártipti elemeıtin 305 tasymaldaýshydan 268 mln 251 myń teńge óndirip alyndy. Mańǵystaýda barlyǵy 239 karer bar. Olardyń 153-i ulýtas shyǵarady. Taǵy 84-i - qıyrshyq tas pen qum, ekeýi - tuz jáne bor óndiredi. Jyl basynan beri jyljymaly baqylaý beketi tekserý júrgizgende 61 karerlik tasymaldaýshyǵa 21 mln teńgeden astam somaǵa aıyppul salyndy.
Osy jyldyń qarasha aıynda óńir basshysy Nurlan Noǵaev Mańǵystaý aýdanyna bardy. Nátıjesinde Shetpe-Jetibaı-Aqtaý jolynda júk avtomobılderin baqylaý beketi ornatyldy.
Eltaı Taıalıevtiń aıtýynsha, barlyq óńirde osy saladaǵy mamandar tapshy.
Aıda Abýlhanova