Mańǵystaý oblysynda aýyl turǵyny óz úıinde bosanyp qaldy

Mańǵystaý oblysynda feldsherler áıeldi úıinde bosandyryp aldy. Bul týraly oblystyq densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat tilshisi.

«Mańǵystaý oblysy jedel jáne shuǵyl medıtsınalyq járdem stantsııasynyń 103 dıspetcherlik pýltine 16 qyrkúıek saǵat 11:01-de «Shuǵyl bosaný» sanatymen Munaıly aýdany Jańa Daýlet mekenjaıy boıynsha shaqyrtý tústi. Quramynda feldsher J. Kýkenova jáne A. Tasım bar brıgada shaqyrtýǵa 11:13-te jetti. Áıelge medıtsınalyq kómek kórsetip, 11:35-te úıinde bosandyrdy», - delingen baspasóz habarlamasynda.

Salmaǵy 3 kg 200 gramm er bala dúnıege kelgen. Ana men bala Mańǵystaý oblystyq perınıtaldyq ortalyǵyna jetkizildi. Basqarma málimeti boıynsha, ekeýiniń de jaǵdaıy jaqsy.