Mańǵystaý oblysynda atom elektr stansysynyń qurylysyn salý boıynsha Reseımen birlesken kásiporyn quryldy
ASTANA. Shildeniń 23-i. QazAqparat /Ernur Aqanbaı/ - Mańǵystaý oblysynda atom elektr stansysynyń qurylysyn salý boıynsha Reseımen birlesken kásiporyn quryldy. Búgin Indýstrııa jáne jańa tehnologııalar mınıstrliginiń keńeıtilgen alqa májilisinde bul týraly Atom energetıkasy jáne ónerkásip departamentiniń dırektory Májıt Sháripov aıtty.
«Qazirgi tańda elimizdegi atom energetıkasyn damytý jóninde daıyndyq jumystary júrgizilýde, Mańǵystaý oblysynda atom elektr stansysynyń qurylysyn salý jónindegi másele pysyqtalýda. Qazirdiń ózinde Reseımen birlesip atom stansysyn jobalý jónindegi birlesken kásiporyn quryldy. Aqtaý qalasynda atom elektr stansysynyń qurylysyn salý jónindegi jobanyń tehnıkalyq-ekonomıkalyq negizdemesi ázirlendi», dedi alqada M. Sháripov.
Sonymen qatar, M. Sháripov Reseımen birlesip BVR-300 ı Atom elektr stansysy reaktorlyq qondyrǵysyn jobalaý boıynsha birlesken jumysty uıymdastyrý salasyndaǵy yntymaqtastyq týraly úkimetaralyq kelisimniń jobasy daıyndalǵanyn atap kórsetti. «Sonymen qatar, perspektıvada Ulttyq ıadrolyq ortalyqpen basqa da óńirlerde atom elektr stansylarynyń qurylysyn salý negizdemesi boıynsha tehnıkalyq-ekonomıkalyq zertteý jumystary júrgizildi. Túrli alańdar qarastyrylyp, onyń beseýi tańdaldy», dedi ol.
