Mańǵystaý oblysynda «ashyq esik» kúni ótip jatyr

AQTAÝ. QazAqparat - Búgin oblys ákimi Serikbaı Trumov jeke máseleleri boıynsha turǵyndardy qabyldady. Aımaq basshysyna aryz-shaǵymdaryn tikeleı betpe-bet jetkizýge múmkindik alǵan azamattardyń basym bóligi turǵyn úı máselesine qatysty suraqtar qoıdy, dep habarlaıdy QazAqparat tilshisi.

Tańsáriden kezek kútken turǵyndar jeke máselelerin aımaq basshysyna jetkizýge asyq. deni jumyssyzdyqty alǵa tartsa, birqatary turǵyndar jer, úı jáne áleýmettik túıtkildermen júgindi. Al, aqtaýlyq Altyn Saqtaǵanova tek ózi emes, ózge de qyz-kelinshekterdiń jaǵdaıyna alańdaıtynyn jetkizdi.

«Ana bolý mektebin» kóterý, aıaqqa turǵyzýdy josparlap júrmin. Oblystyq perınataldyq janynan buryn ashylǵan edi. Ol jabylyp qaldy. Sondyqtan qaıtadan ashý kerek. Jasóspirim qyzdardyń arasynda erte júktilik máselesi oryn alýda. Onyń aldyn alý qajet. Ortalyqta psıhologtar, dárigerler jumys jasaıdy»,-deıdi Altyn Saqtaǵanova.

Aımaq basshysy turǵyndardyń saýaldaryn muqııat tyńdap, zańǵa sáıkes sheshilý joldaryn túsindirip, qala ákimi men tıisti bólim basshylaryna tapsyrmalar júktedi. Jalpy, shara Prezıdent tapsyrmasyna saı ótýde.

»QR Prezıdenti Q.Toqaev ákimderge halyqpen etene jaqyn bolý úshin «ashyq esik» kúnin ótkizýdi tapsyrdy. Qazir bul jerde barlyq basqarma basshylary, quqyq qorǵaý organdarynyń qyzmetkerleri, «Adaldyq alańy» ókilderi jurtshylyqty qabyldaýda«,-deıdi MO Іshki saıasat basqarmasynyń basshysy Erjan Kúmisqalıev.

Aımaq basshysynyń qabyldaýyna túske deıin elýge jýyq turǵyn kelgen. Al, departament jáne basqarma basshylaryna 40-tan astam adam jolyqqan.

Aıta keteıik, shara keshke deıin jalǵasady.