Mańǵystaý oblysynda AITV-ǵa shaldyqqan naýqastardyń eń kishisi – 3 jasta
Óńirde naýqastardyń ishinde 4 bala, 2 jasósipirim bar. Bıyl 3 medıtsına qyzmetkeri AITV-ınfektsııasyn juqtyrǵan.
Jalpy bıyl óńirde atalǵan ınfektsııany juqtyrǵan 76 adam anyqtalǵan. Onyń jeteýi – shetel azamattary. Jyl sońyna deıin 143 myń adamdy tekserýden ótkizý josparlanyp otyr.
«AITV ınfektsııasynyń aldyn alý is-sharalaryn úzdiksiz júrgizý nátıjesinde jyl saıyn tekseristen ótetin halyq sany kóbeıip keledi. 21 qarasha men 1 jeltoqsan aralyǵynda»Teńdik ýaqyty«uranymen ótkizilgen naýqan aıasynda ortalyq mamandary bilim berý mekemelerine, áskerı bólimderge, bıznes nysandaryna, sondaı-aq Halyqqa qyzmet kórsetý ortalyqtaryna baryp, aqparattyq-túsindirý baǵytynda túrli is-sharalar uıymdastyrdy. Basty maqsat – AITV ınfektsııasynan qorǵaný jáne saqtyq sharalary jóninde tolyqqandy maǵlumat berý, osy keselge dýshar bolǵan naýqastarǵa qatysty teris kózqaras pen kemsitýshilikti joıý deýge bolady», - deıdi Mańǵystaý oblystyq JITS-tyń aldyn alý jáne oǵan qarsy kúres jónindegi ortalyqtyń dırektory Ánýar Saǵymbaev.
Búgingi tańda AITV-ınfektsııasyn juqtyrýdyń úsh túrli joly málim. Birinshisi –jynystyq qatynasqa túskende kontratseptsııa quraldaryn qoldanbaý, ekinshisi – qan arqyly, túrli ınektsııalar kezinde zalalsyzdandyrylmaǵan shprıtsterdi qoldaný. Sondaı-aq ınfektsııa anadan nárestege juǵady.
«Oblys boıynsha naýqastardyń 70-ten astam paıyzy jynystyq jolmen juqtyrǵan, 15 paıyzy esirtkige táýeldi adamdar arasynda anyqtaldy. Al aýrý juqtyrǵandardyń 10 paıyzy gomoseksýaldyq qarym-qatynastaǵy er adamdar», - deıdi ortalyq dırektorynyń úılestirý-ádistemelik jáne epıdemıologııalyq jumystar jónindegi orynbasary Aqnur Tasbolatova.