Mańǵystaý oblysynda Ábish Kekilbaev aýdıtorııasy ashyldy
ASTANA. QazAqparat - Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń «Pedagogıka» kafedrasynda halyq jazýshysy, tanymal memleket jáne qoǵam qaıratkeri Ábish Kekilbaevqa arnalǵan oqý aýdıtorııasy ashyldy, dep habarlaıdy Mańǵystaý oblysy ákiminiń baspasóz qyzmeti.
Aýdıtorııany Ábish Kekilbaevtyń jubaıy Klara Jumabaıqyzy men Mańǵystaý oblysynyń ákimi Alık Aıdarbaev saltanatty túrde ashyp, lentasyn qıdy.
«Ábish Kekilbaev qazaq qaýymyn birlikke bastap, elin erteńine úndeıtin, ótken tarıhty saraptap, jurtyna sabaq kórsetetin, ulttyń ustamy, urpaqtyń ustazyna aınalǵan tulǵalar qatarynan boldy. Ábish aǵa oraq aýyz sheshendigimen, kóregen kósemdigimen, aıryqsha talantymen, abyzdyq qasıetimen erekshelenedi. Mańǵystaýda Ábish Kekilbaıuly atyndaǵy rýhanı ortalyq salý máselesi kóterilip, jobalyq jumystary jasaqtaldy. Ortalyq drama teatry sekildi keshen kúıinde salynyp, arnaıy murajaı, kitaphana, kontserttik zal bolatynyn qarastyrǵan. Mańǵystaýlyqtar, sondaı-aq, Ábish Kekilbaıuly entsıklopedııasyn shyǵarý týraly da bastama kóterip, tıisti jumystar atqarýda», - dep atap ótti aımaq basshysy Alık Aıdarbaev.
Ábish Kekilbaıuly atyndaǵy oqý aýdıtorııasy ǵulama darynnyń ǵıbratty ómir joly týraly aqparattardy qamtıtyn «Á.Kekilbaıulynyń ómir joly», «Zamanynyń zańǵar uly», «Á.Kekilbaıulynyń ádebı murasy», «Memleket jáne qoǵam qaıratkeri», «Ábish Kekilbaıuly jáne Mańǵystaý» atty stendilerimen jabdyqtalǵan.
Sonymen qatar, oqý aýdıtorııasynda uly sýretkerdiń qalamynan týǵan halqynyń máńgi rýhanı sýsyndar murasyna aınalar eńbekteri arnaıy kitap sóresine qoıylǵan. Bul sórege jazýshy murasyn zertteýmen aınalysyp júrgen «Qazaq tili men ádebıeti» kafedrasynyń professor-oqytýshylarynyń da monografııalary men oqý quraldary ornalastyrylǵan.
Oqý aýdıtorııasynyń ashylý saltanatynda mańǵystaýlyqtarǵa arnap «Ábish álemi» jýrnalynyń tanystyrylymy ótti.
