Mańǵystaý oblysynda 90 jastaǵy qarııa koronavırýstan jazylyp shyqty

TÚPQARAǴAN. QazAqparat – Mańǵystaý oblysy Túpqaraǵan aýdanynda 90 jastaǵy Atabaı Azmaǵambetov koronavırýstan jazylyp shyqty, dep habarlaıdy QazAqparat tilshisi.

Búgin Atabaı Azmaǵambetov Túpqaraǵan aýdandyq ortalyq aýrýhanasynyń koronavırýs ınfektsııasyna arnalǵan bóliminen emdelip shyqty. Atabaı aqsaqal atalǵan bólimge koronavırýs ınfektsııasy, ókpeniń eki jaqty qabynýy dıagnozymen 24 mamyr kúni túsken edi.

Túpqaraǵan aýdandyq ortalyq aýrýhanasynyń bas dárigeri Gúlshat Shalabaeva aqsaqaldyń qazirgi jaǵdaıy týraly aıtty.

«Atabaı aqsaqal 20 mamyrdan bastap aýyra bastaǵan. Óziniń aıtýynsha, denesinde álsizdik belgiler paıda bolǵan. Januıasy bizge habarlasqannan keıin, dárigerler shuǵyl túrde úıine baryp, densaýlyǵyn tekserdi. Aqsaqaldyń ókpesin tyńdaý nátıjesinde jáne kompıýterlik tomografııa qorytyndysyna sáıkes naýqastyń ókpesiniń 35 paıyzy zaqymdalǵany anyqtaldy. Aqsaqal aýrýhanaǵa 24 mamyrda qabyldandy. Búgin dertten aıyǵyp, otbasymen aman-esen qaýyshyp otyr»,- dedi ol.

Dáriger turǵyndarǵa koronavırýs ınfektsııasynyń negizgi belgileriniń álsizdik, dene qyzýynyń kóterilýi, jóteldiń paıda bolýy, ishtiń ótýi men terleý ekendigin aıtty. Mundaı belgiler paıda bolǵan jaǵdaıda dereý dárigerler kómegine júginý kerek.

«Sońǵy tájirıbeler kórsetip otyrǵandaı, jótel belgisi joq, alaıda denesinde álsizdik qana baıqalǵan azamattardyń eki ókpesiniń birdeı qabynǵany anyqtalyp otyr. Sondyqtan da, turǵyndardy densaýlyqtaryna beı-jaı qaramaýǵa, sanıtarlyq talaptardy saqtaýǵa, meılinshe vaktsına qabyldaýǵa shaqyramyn»,-dedi Gúlshat Shalabaeva.