Mańǵystaý oblysynda 800-ge jýyq úkimettik emes uıym jumys isteıdi
Jıynǵa ákimnen bólek, óńirdegi ÚEU basshylary men ókilderi, sala ardgerleri, jergilikti organdardyń basshylary qatysty.
Mańǵystaý oblysynda 781 ÚEU tirkelgen. Sonyń ishinde 120 uıym jastar saıasaty, halyqtyń áleýmettik az qamtylǵan tobyn qoldaý, bilim berý, salaýatty ómir saltyn nasıhattaý, azamattardyń ómiri men quqyqtaryn qorǵaý salasyndaǵy qyzmetterdi belsendi úılestirip otyr.
Aıta keteıik, byltyr alǵash ret óńirde qoǵamdyq uıymdardyń áleýetin arttyrý maqsatynda granttyq qarjylandyrý tetigi engizilip, azamattyq qoǵamdy damytýǵa baǵyttalǵan keshendi bastamalardy qarjylandyrý jolǵa qoıyldy. Oblysta sońǵy bes jylmen salystyrǵanda áleýmettik mańyzy joǵary jobalardy qarjylandyrý 43,6 paıyzǵa artqan.
Sonyń nátıjesinde qoǵamdyq uıymdar memlekettik sheshim qabyldaýda kóptegen balamaly kózqarasty usynyp, áleýmettik máselelerdi sheshýge erekshe kóńil bólýde. 2022 jyly 47 áleýmettik jobaǵa 406 mln teńge bólinse, bıyl qarjy kólemi 602 mln teńgege ósti.
Saltanatty shara barysynda azamattyq qoǵamnyń damýyna atsalysyp júrgen sala ardagerleri merekelik medalmen marapattaldy.
«Mańǵystaý» jergilikti bastamalar ortalyǵy» qoǵamdyq qorynyń dırektory Jaqsygúl Mahanbetovanyń aıtýynsha, qazirgi tańda ÚEU-n qoldaý maqsatyndaǵy jumystar jandanýda.
«Shırek ǵasyrdan beri ÚEU salasynda azamattyq qoǵamnyń damýyna atsalysýdamyn. Ózderińiz bilesizder, azamattyq qoǵamdy damytýdyń alǵashqy kezeńderinde dál mundaı múmkindikter bolmady. Al qazir bizdiń jumystar bir júıege kelip, jańa áleýmettik jobalardyń sany artýda. Qoldaý bar, sonyń arqasynda nátıjege jetip, jobalarymyz sátti oryndalyp, óńirdegi ózekti máseleler oń sheshilip jatyr» - dedi Jaqsygúl Mahanbetova.
Aımaq basshysy Nurlan Noǵaev jahandyq máselelerdi sheshýde ÚEU-nyń róli zor ekenin, Qazaqstanda azamattyq qoǵamdy qalyptastyrý men damytýdaǵy belsendiligin atap ótti.
«Memleket basshysy Qasym-Jomart Toqaevtyń tapsyrmasymen «Azamattyq qoǵamdy damytýdyń tujyrymdamasy» bekitilip, memlekettik isterdi basqarý protsesine azamattyq qoǵam ınstıtýttarynyń qatysý deńgeıi artyp keledi. Osy rette jyl saıyn úkimettik emes uıymdarǵa bólingen qarajat kólemi, áleýmettik jobalar sany men qamtylǵan turǵyndar sany ulǵaıyp, jobalardyń salalyq prıntsıpteri keńeıtilýde. Úkimettik emes uıymdar – qoǵamdyq progrestiń qozǵaýshy kúshi, oń ózgeristerdiń lokomotıvi bolyp otyr. Biz úshin úkimettik emes uıymdar men memleket arasyndaǵy áriptestik qatynastardy damyta berýdiń mańyzy zor. Sondyqtan azamattyq qoǵamnyń damýyna qosqan zor úlesińiz úshin Sizderge alǵysymdy bildiremin!» - dedi Nurlan Noǵaev.
