Mańǵystaý oblysynda 756 adam men 107 tehnıka joldardy qardan tazartý jumystarymen aınalysýda
ASTANA. Qańtardyń 29-y. QazAqparat - Qardyń mol jaýýyna baılanysty Mańǵystaý oblysynda barlyq baǵyttar boıynsha kúre joldar jabyldy.
Respýblıkalyq jáne oblystyq mańyzdaǵy avtojoldardy tazartý jumystarymen 756 adam men 107 tehnıka aınalysýda, dep habarlady QR TJM-nyń baspasóz qyzmetinen.
Vedomstvo ókilderiniń sózine qaraǵanda, qardyń mol túsýi tirshilikti qamtamasyz etý nysandaryna kedergi keltirgen joq jáne olar qalypty rejimde jumys atqarýda.
Sondaı-aq keshe, 15 saǵat 45 mınýtta burqasyn men kóktaıǵaqtyń bolýy saldarynan Almaty oblysynda «Almaty-Óskemen» avtojolynyń 557-692 shaqyrym aralyǵyndaǵy bóligi jabyldy. Aıta keteıik, Almaty oblysynan «Úsharal-Dostyq» baǵytyna shyǵatyn tas jol qańtardyń 25-inen beri jabyq. Al qańtardyń 27-sinen bastap Shyǵys Qazaqstanda aýanyń kúrt sýytyna oraı kóliktiń barlyq túrleri úshin respýblıkalyq mańyzdaǵy «Qaraǵandy-Aıagóz-Botaz» kúre jolynda qozǵalystar shekteýli.
