Mańǵystaý oblysynda 60-tan astam etnos ókili turady

AQTAÝ. QazAqparat – Mańǵystaý oblysy Qazaqstan halqy Assambleıasy jyl basynan jaǵdaıy tómen otbasylarǵa, jalǵyzbasty ardagerlerge, balalar úıi men qarttar úıine, «Biz adamdar-biz birgemiz» qaıyrymdylyq uıymyna udaıy demeýshilik etip keledi. Sondaı-aq óńirdegi 60-tan astam etnos ókilderiniń mádenıeti, tili men salt-dástúriniń ósip-órkendeýine yqpal etetin sharalardy uıymdastyrýǵa uıytqy bolýda.QazAqparat tilshisiniń Mańǵystaý oblysy ishki saıasat basqarmasynyń «Qoǵamdyq kelisim» KMM basshysy Amankúl Jaılhanovamen suhbatyna osynaý ıgilikti ister arqaý bolǵan.

- Amankúl Ábdiǵalıqyzy, oblysta «Dostyq úıi» salyndy. Bul kóp fýnktsııalyq úı 20 etnomádenı birlestikti bir shanyraq astynda biriktirip otyr. Jalpy óńirde qansha ulttyń ókili turady?

- Mańǵystaý oblysynda 60-tan astam etnos ókili turady, sonymen qatar óńirde mádenıet, til, salt-dástúr men ádet ǵurypty nasıhattaıtyn 20 etnomádenı birlestik jáne Qoǵamdyq kelisim keńesi, Analar keńesi, RJQ «Jańǵyrý joly» óńirlik shtaby, Ǵylymı saraptamalyq top, medıatsııa, «Biz birgemiz» kabınetteri jumys isteıdi. Bularda halyqaralyq, respýblıkalyq jáne óńirlik deńgeılerdegi is-sharalar ótkiziledi. Atap aıtar bolsam, Mańǵystaý oblysynda aqparattyq-nasıhattyq jumystyń sapasyn jaqsartý maqsatynda 2020 jylǵa arnaıy is-sharalar jospary jasaqtalyp, aýqymdy jumystar júzege asty. Bıyl álemdik koronavırýs pandemııasyna baılanysty biraz sharalarymyz onlaın ótti. Abaıdyń 175 jyldyǵy, QHA 25 jyldyǵy t.b. volonterlerdiń kómegimen qaıyrymdylyq sharalar retinde jáne onlaın ótkizildi.

- Volonterler jylynda QHA bastamasymen qandaı jumystar atqaryldy? Biraýyq soǵan toqtalyp ótseńiz.

Mańǵystaý oblysy «Dostyq úıi» bazasynda Qazaqstan halqy Assambleıasy Volonterler qozǵalysynyń ortalyǵy ashyldy. Bul qozǵalystyń negizgi 4 baǵytynyń biri – birlik. Maqsaty: volonterlerdiń naqty áleýmettik mindetterdi sheshýge, halyqtyń qorǵalmaǵan toptaryna kómek kórsetýge baǵyttalǵan áleýmettik mańyzdy jobalardy uıymdastyrý. Negizgi baǵyty – muqtajdarǵa kómek kórsetý boıynsha qoǵamdyq-buqaralyq is-sharalardy uıymdastyrý jáne ótkizý. Barlyǵy 7 mln teńge somasynda etnomádenı birlestikter men kásipkerler jáne volonterlerdiń qoldaýymen azyq-túlik, gıgıenalyq quraldarymen qosa 10 myńǵa jýyq maska taratyldy. Sonymen qatar, Mańǵystaý oblysy Qazaqstan halqy Assambleıasy sý tasqyny saldarynan zardap shekken Túrkistan oblysy, Maqtaaral aýdanyndaǵy otandastarymyzǵa 10 tonna (azyq-túlik, kıim-keshek, gıgıenalyq quraldary) jiberdi.

- Ǵylymı-aǵartýshylyq baǵytta qandaı jumys atqaryldy?

- «Qazaqtaný» ǵylymı – aǵartýshylyq jobasy aıasynda, Mańǵystaý oblysy Qazaqstan halqy Assambleıasy ǵımaratynda Qazaqstan Respýblıkasynyń Tuńǵysh Prezıdenti – Elbasynyń tapsyrmalaryn oryndaý maqsatynda, «Sıtýatıvnyı kazahskıı – «Mámile» jobasyn iske asyrý boıynsha etnos ókilderi arasynda memlekettik tildi úırengisi keletinder men oǵan úıretetinderge arnalǵan «Mámile» dıalog alańy ashyldy. Klýb jumysy «Sıtýatıvnyı kazahskıı» kitabynyń avtory Q. Tasybekovtiń ádistemesimen iske asyrylýda. Sonymen qatar, memlekettik jáne etnos tilderin oqytatyn jeksembilik mektepter jumys isteıdi. Olar: «Vıderbýrg» nemis etnomádenı birlestiginiń bastaýysh mektebi, «Samýr» lezgın etnomádenı birlestigi, «Dagestan» daǵystan etnomádenı birlestigi jáne «Choson» káris etnomádenı birlestigi.

- Suhbatyńyzǵa raqmet!