Mańǵystaý oblysynda 6 kásiporynǵa 20 mln jýyq aıyppul salyndy

AQTAÝ. QazAqparat – Bıylǵy alty aıda Mańǵystaý oblysyndaǵy 6 óndiristik nysanǵa jospardan tys tekserý júrgizilgen. Anyqtalǵan zań buzýshylyqtar boıynsha jalpy somasy 19 320 000 teńge aıyppul salynǵan. Bul týraly oblys ákiminiń baspasóz qyzmetinen málim etti, dep habarlaıdy QazAqparat tilshisi.

«Alty aıda óńirde 15 jazataıym oqıǵa bolyp, 19 qyzmetker zardap shekti. Onyń ishinde 13 qyzmetker aýyr jaraqat alyp, 6 adam qaza tapqan. 2022 jyldyń osyndaı kezeńinde kásiporyndarda 19 jazataıym oqıǵa bolǵan, sonyń saldarynan 25 adam zardap shegip, bireýi qaza tapqan», - deıdi oblystyq memlekettik eńbek ınspektsııasy basqarmasynyń basshysy Alıger Іńkárov.

Mańǵystaý oblysynyń sanıtarııalyq-epıdemıologııalyq baqylaý departamenti 2022-2023 jyldardyń alǵashqy alty aıynda óńirdegi barlyq aýdandar men Aqtaý jáne Jańaózen qalalarynda 60 josparly tekseris júrgizgen.

Bas prokýratýranyń tapsyrmasy boıynsha 6 óndiristik nysanǵa jospardan tys tekserý júrgizilip, nátıjesinde jalpy somasy 19 320 000 teńge aıyppul salynǵan.

«Tekserý barysynda 164 zań buzýshylyq anyqtaldy. Olardy joıý úshin 24 nusqama berilip, 11 ákimshilik quqyq buzýshylyq týraly is qozǵalyp, sondaı-aq 13 eskertý jazyldy», - dedi Alıger Іńkárov.

Atap aıtqanda, óndiristik baqylaýdyń jetkiliksizdigi jáne jeldetý júıeleriniń bolmaýy, jumys oryndarynda mıkroklımattyń saqtalmaýy jáne óndiristegi jumys jaǵdaılarynda sanıtarııalyq-gıgıenalyq talaptardyń oryndalmaýy sııaqty zań buzýshylyqtar tirkelgen.