Mańǵystaý oblysynda 5460 adam koronavırýs vaktsınasyn saldyrdy

AQTAÝ. QazAqparat - Mańǵystaý oblysynda vaktsına salatyn 17 pýnkt jumys istep tur. Al, Aqtaý qalasyndaǵy jyljymaly egý pýnkteriniń sany – úsheý, dep habarlaıdy QazAqparat tilshisi oblystyń densaýlyq saqtaý basqarmasynyń baspasóz qyzmetine silteme jasap.

7 sáýir kúngi málimet boıynsha 645 adamǵa vaktsınanyń І komponenti egildi.

Atap aıtqanda, «Neıron» medıtsına klınıkasynda - 100, QHA ǵımaratyndaǵy pýnkte - 20, Munaıly aýdandyq OA- 70, Túpqaraǵan aýdandyq OA - 25, Mańǵystaý aýdandyq OA - 15, Beıneý aýdandyq OA - 70, Aqtaý qalalyq No1 emhanasy - 160, Aqtaý qalalyq emhanasy No 2 emhanasy - 70, «Medıker plıýs» medıtsına klınıkasy - 15, «ıAsın» medıtsına ortalyǵy - 60 adam, Jetibaı aýyldyq aýrýhanasy - 15, «Senim» medıtsına klınıkasy - 25.

Vaktsınanyń II komponentimen 85 adam egildi. «Neıron» medıtsına klınıkasynda - 20, Munaıly CRH - 30, Túpqaraǵan CRH - 20, No 2 Aqtaý qalalyq emhanasynda - 15.

Osylaısha, vaktsınatsııa bastalǵannan beri oblysta egilgenderdiń jalpy sany 5460 adamdy qurady. Vaktsınanyń qalǵany – 3835 doza.

Budan bólek, búgin Aqtaý qalasynyń irgesindegi óndiristik aımaqta ornalasqan «QazAzot» mekemesiniń ǵımaratynda «ıAsın» emhanasynyń jyljymaly egý pýnkti ashyldy.

Mundaǵy egý kabıneti kún saıyn 10:00 - 14:00 aralyǵynda jumys isteıdi. Alǵashqy kúni egý pýnktinen «QazAzot» mekemesiniń 40 qyzmetkeri koronavırýsqa qarsy vaktsına saldyrdy.

Vaktsına alǵan «QazAzot» AQ qyzmetkeri Aqbota Týlaeva ekpeden keıin ózin jaqsy sezinip, eshqandaı shaǵym bolmaǵandyǵyn aıtty.

«Ózimdi óte jaqsy sezinip otyrmyn. Árıne, bastysy - adamnyń óz jaýapkershiligi. Jaqyndaryń úshin aýyrmaýdyń, olarǵa juqtyrmaýdyń jolyn tabý. Búgin aldyn ala tekserýden jaqsy nátıje boldy, ári qaraı ekpe aldym. Bári jaqsy ótti»,-deıdi ol.

«ıAsın» medıtsına ortalyǵynyń dárigeri Tatıana Pavlovanyń aıtýynsha, protsedýradan buryn árbir mamannyń densaýlyǵy tekserýden ótedi.

Qan qysymy, dene temperatýrasy, basqa da kórsetkishteri ólshenedi.

Medıtsınalyq qarsy kórsetilim bolmaǵan jaǵdaıda erikti túrde ekpe alýǵa kelgen adamǵa vaktsına egiledi.

Ekpe tegin salynady. Qazirgi tańda salynyp jatqan vaktsına - «SPÝTNIK-V».

Aldaǵy ýaqytta óndiristegi mamandar ekpe pýnktinen vaktsına alýdy josparlap otyr.

«ıAsın» medıtsına ortalyǵy aldaǵy kúnderi halyq kóp shoǵyrlanatyn 16 shaǵynaýdandaǵy «Aqtaý» OSO jáne 19a shaǵynaýdanda ornalasqan Á.Kekilbaev atyndaǵy oblystyq ólketaný murajaıy ǵımaratynda egý pýnktin uıymdastyrýdy josparlap otyr.

Mańǵystaýda kún saıyn jańa jyljymaly egý pýnkteri ashylyp jatyr.