Mańǵystaý oblysynda 30 áıel esirtki tutyný boıynsha esepte tur
Jalpy, Mańǵystaý oblysynda jyl basynan beri esirtkige qarsy 54 quqyq buzýshylyq anyqtalǵan. Onyń ishinde 46-sy esirtki qylmysyna qatysty teris qylyq deregi bolsa, 6 esirtki zattaryn satý jáne 2 asa iri kólemde saqtaý deregi tirkelgen.
2023 jyly zańsyz aınalymnan 4 keli 244 gramm esirtki tárkilengen. Onyń ishinde 2 keli 864 gramm marıhýana, 1 keli 375,3 gramm sıntetıkalyq esirtki men 3,7 gramm gashısh, 1 gramm apıyn bar.
«Jyl basynan beri qoǵamdyq orynda esirtki saýdasyn jarnamalaıtyn 350 graffıtı jazýlary anyqtalyp, joıyldy. Sonymen qatar, esirtki zattary men olardyń analogterin jarnamalaıtyn 15 ınternet saıt buǵattaldy», - dedi Mańǵystaý oblysy PD esirtki qylmysyna qarsy kúres basqarmasynyń asa mańyzdy tapsyrmalar jónindegi aǵa jedel ýákili Kamıl Býdaıchıev.
Sondaı-aq, óńirde 30 áıel esirtki tutyný boıynsha esepke alynǵan.
«Esirtkini qoldaný adam aǵzasynyń qalypty jumysyna keri áserin tıgizip, ár alýan ózgeristerge ushyraýyna sebep bolady. Tipti, esirtki qoldanatyn áıelderdiń sábılerinen bastapqy kezeńde nashaqorlyq sındromdary baıqalady. Júkti ananyń esirtkini tutynýy shaqalaqtyń shala týýyna, dimkás bolýyna áser etedi. Bul ǵylym turǵysynan dáleldengen», - dedi Mańǵystaý oblystyq densaýlyq saqtaý basqarmasynyń psıhıkalyq densaýlyq ortalyǵynyń bólim meńgerýshisi Qorlan Eleýova.
