Mańǵystaý oblysynda 24 memqyzmetshi tártiptik jaýapkershilikke tartyldy
ASTANA. QazAqparat - 2016 jyly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Mańǵystaý oblysy boıynsha departamentimen Ádep jónindegi keńestiń 9 otyrysy ótkizildi.
Olarda qaralǵan 60 máseleniń 40-y - memlekettik qyzmetshilerge qatysty tártiptik ister.
Bul týraly brıfıng barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi Mańǵystaý oblysy boıynsha departamenti basshysynyń mindetin atqarýshy Erlegen Mendalıev habarlady.
Spıkerdiń aıtýynsha, 24 memlekettik qyzmetshige qatysty usynystar engizildi. Olardy qaraý nátıjesinde 8 memqyzmetshi memlekettik qyzmetke kir keltirgeni úshin alyp otyrǵan laýazymyna tolyq sáıkes emestigi týraly eskertý túrindegi tártiptik jaýapkershilikke, qalǵan 16-sy etıkalyq talaptardy buzǵandyǵy úshin tártiptik jaýapkershilikke tartyldy.
«24 memlekettik qyzmetshiniń 2-i - memlekettik organdardyń basshylary, 1 - qala ákiminiń orynbasary, 1 - memlekettik organ basshysynyń orynbasary, 1 - aýdan ákimi apparatynyń basshysy, 3 - aýyl ákimderi, 12 - bólim basshysy jáne 4 - bas maman»-dep atap ótti E.Mendalıev.
2016 jyly jergilikti buqaralyq aqparat quraldarynda memlekettik organdardyń qyzmetkerlerine qatysty 6 synı materıal jarııalanyp,olarǵa qatysty tıisti sheshim qabyldandy.
«Lada.kz» saıtynda jarııalanǵan synı materıal negizinde Ádep jónindegi keńes hatshylyǵymen ótkizilgen tekseris nátıjesinde Mańǵystaý aýdany ákimi apparatynyń basshysy L.Jonasov qyzmetinen bosatyldy. Anyqtalǵandaı, Jonasov avtokólikti masań kúıde júrgizgen.
