Mańǵystaý oblysynda 200 myńnan astam adam jer kezeginde tur

AQTAÝ. QazAqparat - Mańǵystaý oblysynda úı salýǵa jer alý úshin 205 myń 400 azamat kezekke tirkelgen. Bul týraly qoǵamdyq kommýnıkatsııa ortalyǵynda ótken brıfıngte oblystyq jer qatynastary basqarmasynyń basshysy Esemurat Dúzmaǵanbetov málim etti, dep habarlaıdy QazAqparat.

Onyń aıtýynsha, jer kezegine turǵandar sany artyp otyr. Máselen, 2020 jyly bul kórsetkish 172 myń 933 bolǵan.

- Jer ýchaskesine kezektiń ulǵaıýy - kezek tiziminiń elektrondyq formatqa ótkizilip, kezekke tirkelý protsessiniń avtomattandyrylýyna baılanysty bolyp otyr. Jer ýchaskesine tirkelý Egov portaly arqyly júrgiziledi. Bul buryn memleketten jer ýchaskesin almaǵan azamattarǵa ákimdikke barmaı, qashyqtan ótinish berip, elimizdiń kez kelgen eldi mekenine jer kezegine turýǵa múmkindik beredi, - deıdi Esemurat Dúzmaǵanbetov.

Basqarma basshysynyń málimetinshe, Aqtaý jáne Jańaózen qalalarynda jeke turǵyn úı qurylysy úshin bos alań qaralmaǵan. Basqa aýdandar boıynsha bos 21 156 ýchaske bar.

Sonyń ishinde ınfraqurylymmen qamtylǵany – 2055 ýchaske (7,8 %). Atalǵan ýchaskeler elektr jelisimen tolyqtaı, gaz jáne sýmen ishinara qamtamasyz etilgen.

- Ótken jyly jerge qatysty biraz zańdarǵa ózgeris engizildi. Qazirgi kezde QR Jer Kodeksiniń 33-babynyń 5-1 tarmaqshasyna sáıkes, jalǵa berilgen aýyl sharýashylyǵy maqsatyndaǵy jer ýchaskeleriniń jer paıdalaný quqyǵyn satyp almaı, basqa tulǵaǵa satý, syıǵa tartý jáne basqa da mámileler jasaý múmkindigi paıda boldy, - deıdi Esemurat Dúzmaǵanbetov.