Mańǵystaý oblysynda 20 jyldan beri tyrysqaq aýrýy tirkelmegen

AQTAÝ. QazAqparat – Mańǵystaýda 20 jylda tyrysqaq aýrýy tirkelmegen. Sońǵy úsh aıda 439 sý synamasy zerttelip, nátıjesinde tyrysqaq vıbrıony anyqtalmaǵan. Bul týraly Qoǵamdyq kommýnıkatsııa ortalyǵynda ótken brıfıngte óńirlik Sanıtarııalyq-epıdemıologııalyq baqylaý departamentiniń basshysy Gúlnar Kórkinbaeva málim etti, dep habarlaıdy QazAqparat tilshisi.

Spıkerdiń aıtýynsha, aýrýdy qozdyrǵysh bakterııa ádette aǵzaǵa zalaldy tamaqpen nemese sýmen enedi. Kóbinese bul aýrý sanıtarııalyq-epıdemıologııalyq normalardyń saqtalmaýynan, adamdardyń gıgıenalyq talaptardy oryndamaýynan jáne tekserilmegen taǵamdardy jep, las sýdy ishýinen paıda bolady.

«Tyrysqaq aýrýynyń aldyn alý úshin tamaq daıyndar aldynda qoldy muqııat jýý qajet. Qaınatylǵan nemese bótelkedegi sýdy ishken abzal. Ruqsat etilgen sý aıdyndarynda shomylyp, teńizdiń, muhıttyń jáne basqa da sý obektileriniń shıki ónimderin paıdalanbaǵan durys. Azyq-túlik, jemis-jıdek pen kókónisti qaınatylǵan nemese bótelkedegi sýmen muqııat jýý kerek», – deıdi Gúlnar Kórkinbaeva.

Brıfıng barysynda «Mańǵystaý obaǵa qarsy kúres stantsııasy» fılıalynda epıdemıologııalyq suraqtar jóninde orynbasardyń mindetin atqarýshy Jadyra Edilova tyrysqaq aýrýynyń belgileri týraly aıtyp ótti.

«Eger adamda júrek aıný, qusý, ish ótý, bas aýrýy jáne bas aınalý sekildi belgiler paıda bolǵan jaǵdaıda dereý dárigerge júginý qajet. Únemi turǵyndar arasynda aqparattyq-túsindirme jumystary júrgizilip otyrady. Aýrý juqtyrmas úshin mańyzdy gıgıenalyq daǵdy – qoldy sabyndap jýýdy ádetke aınaldyrǵan jón. Aýyryp em izdegenshe, aýyrmaıtyn jol izdeıik», – deıdi Jadyra Edilova.