Mańǵystaý oblysynda 158 shaqyrym jol qaıta jańartylýda⠀

NUR-SULTAN. QazAqparat – Mańǵystaý oblysynda respýblıkalyq mańyzy bar 158 shaqyrym jol qaıta jańartylýda, dep habarlaıdy oblystyq ákimdiktiń baspasóz qyzmeti.

Búginde Mańǵystaý oblysynda respýblıkalyq mańyzy bar uzyndyǵy 85 shaqyrym R-1 «Beıneý-Aqjigit-Ózbekstan Respýblıkasynyń shekarasy» avtojoly men A-34 «Jetibaı-Jańaózen-Kendirli-Túrikmenstan Respýblıkasynyń shekarasy» avtojolynyń 73 shaqyrymyna qaıta jańartý jumystary júrgizilýde.

«Beıneý-Aqjigit-Ózbekstan Respýblıkasynyń shekarasy (Nýkýs)» avtojolyndaǵy qaıta jańartý jumystarynyń nátıjesi boıynsha kúre jol ІІ-tehnıkalyq sanatqa keltiriledi. Aǵymdaǵy jyldyń sońyna deıin jol ótkeli, jol-paıdalaný ýchaskesi men avtojoldyń 85 shaqyrymynda ornalasatyn jylytý pýnktiniń qurylysyn aıaqtaý kózdelgen. Sonymen qatar, jol telimi boıynsha jáne joldy abattandyrý boıynsha barlyq jumystardy aıaqtap, nysandy paıdalanýǵa berý josparlanǵan.

Bul nysanda 332 bilikti maman men 155 birlik tehnıka jumyldyrylǵan.

Al uzyndyǵy 73 shaqyrym «Jetibaı-Jańaózen-Kendirli-Túrikmenstan Respýblıkasynyń shekarasy» avtojoly І-b tehnıkalyq sanatyna keltirilip, joldyń eni 27,5 metrlik, tolyq 4 jolaqty jol bolady.

Qazirgi tańda jolshylar jer qazý jumystaryn aıaqtap, jol jabynynyń joǵarǵy jáne tómengi qabattaryn tósedi. Nysanda 15 temirbeton qubyrlar ornatyldy. 2019 jyldyń jospary boıynsha Jańaózen qalasy men Shetpe aýylynda jol-paıdalaný ýchaskesiniń qaıta jańartý jumystary men qurylysy júrgiziledi.

Búginde nysanda 800 adam men 565 birlik jol-qurylys tehnıkasy jumyldyrylǵan. Avtomobıl joly barlyq qaýipsizdik talaptaryna sáıkes abattandyrylady. Kúre joldyń ósi boıynsha qorshaýlar men joldyń boıynda jańa jol belgileri ornatylyp, jolaqtar salynady.

Nysandaǵy jumystardyń tolyq aıaqtalýy 2019 jyldyń sońyna josparlanǵan.