Mańǵystaý oblysynda 123 mobıldi top jumys isteıdi

AQTAÝ. QazAqparat – Mańǵystaý oblysynda 123 mobıldi brıgada jumys isteıdi. Onyń 76-sy Aqtaý qalasynda, 47-si aýdandarǵa tıesili, dep habarlaıdy QazAqparat tilshisi. Bul týraly Qoǵamdyq kommýnıkatsııa ortalyǵynda ótken brıfıngte Mańǵystaý oblysy densaýlyq saqtaý basqarmasy basshysynyń orynbasary Lázzat Esenǵalıeva málim etti.

Onyń aıtýynsha, turǵyndar ózin jaısyz sezingen jaǵdaıda tirkelgen emhanaǵa qońyraý shalyp, mobıldi brıgadany shaqyrta alady. Arnaıy top qaýipti vırýstyń jáne pnevmonııa belgileri bar turǵyndar men sozylmaly aýrýlarǵa shaldyqqan naýqastarǵa úıden qyzmet kórsetedi. Sondaı-aq júkti áıelder men balalarǵa patronaj júrgizedi.

«Mańǵystaý oblysy boıynsha 412 ınfektsııalyq tósek-oryn bar. Qosymsha reanımatsııalyq 54 tósek-oryn jasaqtaldy. Al rezervte 2 452 tósek- oryn daıyn tur», - dedi Lázzat Esenǵalıeva.