Mańǵystaý oblysynda 1200 bıznes nysanynyń jumysy toqtaǵan

NUR-SULTAN. QazAqparat - Jumys saparymen Mańǵystaý oblysyna kelgen Májilis depýtaty Sáken Ótebaev áleýmettik mańyzdy nysandardy aralaýmen qatar, kásipkerlik salasyna aıryqsha nazar aýdardy. Óıtkeni, karantın kezindegi shaǵyn jáne orta bıznesti damytý máselesi ózekti suraqtardyń biri, dep habarlaıdy QazAqparat tómengi palatanyń baspasóz qyzmetine silteme jasap.

Osy oraıda óńirdegi kásipkerlerdi qoldaý sharalary nyǵaıtý maqsatynda depýtat túıitkildi máselelerdi talqylady. Óńirlik Kásipkerler palatasynyń uıymdastyrýymen karantınde zardap shekken shaǵyn bıznes ıeleri arasynda saýalnama júrgizilýde. Onyń qazirgi nátıjesi boıynsha kásipkerler nesıelerdi shegerý, salyq mindettemelerin tóleý, óndiris aýqymyn azaıtý, shıkizat qunynyń ósýi, 42500 áleýmettik tólem alý, kommýnaldyq jáne ǵımarattardy jalǵa alý tólemderi syndy birqatar máseleler anyqtaldy. Depýtatqa bıznes salasynyń 37 túri boıynsha 1200 orta jáne shaǵyn bıznes nysandary jumysyn toqtatqany týraly aıtyldy. Sonyń saldarynan 2 myńǵa jýyq adam jumyssyz qaldy. Oblysta orta eseppen óndiris kólemi 18% kemidi. Karantın saldarynan azyq-túlik emes nysandar: 40 saýda ortalyǵy men 32 bazar, qoǵamdyq tamaqtanýmen aınalysatyn 380 meıramhana men dámhana, 45 kólik kompanııasy, 24 sulýlyq salony, 39 monsha men saýnalardyń jumystary toqtady.

Odan ári halyq qalaýlysy birqatar kásiporyndar jumystarymen tanysyp, Aqtaýdaǵy birqatar dárihanalardy aralady.