Mańǵystaý oblysynda 10 aýyldyń ataýy birdeı
AQTAÝ. QazAqparat - Mańǵystaý oblysynda 10 aýyldyń ataýy birdeı. Olardy erekshelep turǵany janyna qosylyp aıtylatyn sandar ǵana, dep habarlaıdy QazAqparat «Habar 24» telearnasyna silteme jasap.
Atap ótilgendeı, tek Munaıly aýdanynda Mańǵystaý-1, Mańǵystaý-2, Mańǵystaý-3, Mańǵystaý-4 jáne Mańǵystaý-5 ataýlarymen eldi mekender bar. Sondaı-aq oblys kartasynan Mańǵystaý aýdanyn da kórýge bolady. Bul qonaqtardy ǵana emes, jergilikti turǵyndardyń ózin shatastyrady. Óńir belsendileri jaǵdaıdy ózgertpek bolyp, bılikten aýyldardyń ataýyn ózgertýdi surady.
«Oblys pen aýdanǵa bir ataý berý - tym artyqtaý sııaqty. Munda Mańǵystaý dep atalatyn kósheler de bar. Aýyldardy belgili tulǵalardyń esimimen nege atamasqa?», - deıdi qoǵam qaıratkeri Kıikbaı Jaqypov.
Munaıly aýdanynyń ákimdigi qoǵam belsendileriniń usynysyna qulaq asyp, birneshe aı boıy aýyldardyń ataýyn ózgertý máselesin qarastyrdy. Nátıje - Mańǵystaýdyń bes aýylyn oblystyń tarıhı, kıeli jerleriniń ataýymen ataý josparlanýda. Olar - Sherqala, Aıraqty, Bozjyra, Aqespe jáne Besshoqy.
«Oblys ákimine hat joldadyq. Óńirlik onomastıkalyq komıssııaǵa óz usynysymyzdy engizdik. Úkimet Qaýlysyna sáıkes, eldi mekenniń ataýyn ózgertý kezinde turǵyndardyń pikirin eskerý qajet. Endi qazan aıynyń sońynda onomastıkalyq komıssııanyń otyrysy ótedi. Mańǵystaý-1, 2, 3, 4 jáne 5-tiń ataýlary ózgeredi dep úmittenemiz», - dep atap ótti Munaıly aýdany ákiminiń orynbasary Berik Bilálov.
Aıta keteıik, Munaıly aýdanynda tek sandardan turatyn kósheler bar. Olardy da taıaý ýaqytta ózgertý kózdelgen.
