Mańǵystaý oblysynan áskerge attanǵan egizder bir bólimde qyzmet etedi
Áskerge shaqyrylýshylardy «Qarýly Kúshterdiń ardagerleri» RQB Mańǵystaý oblystyq fılıalynyń tóraǵasy zapastaǵy polkovnık Nurlybaı Qonaqbaev quttyqtap, aqjol tiledi.
Bir qyzyǵy, áskerge shaqyrylǵan jastardyń arasynda Saıasat pen Saıahat atty egiz bala bar. Týǵaly beri birge kele jatqan aǵaıyndy Sultanmurattar mektepke de birge baryp, grek-rım kúresimen birge aınalysty. «Bolashaq» Kaspıı óńiri kolledjin «ǵımarattar men qurylystardy salý jáne paıdalaný» mamandyǵy boıynsha úzdik bitirgen. Bıylǵy kúzde áskerge de bir komandamen shaqyrylǵan olar medıtsınalyq komıssııadan, psıhologııalyq zertteýden ótip, áskerı qyzmetke jaramdy dep tanyldy.
Merzimdi qyzmetin óteýge bar ynta-jigerimen kelgen olar áskerı bólimde de bir-birine serik bolatynyna senimdi.
– Sender kishkentaı kúnderińnen kez kelgen jumysty birge atqarýǵa daǵdylandyńdar. Endi, mine, áskerge de birge attanyp barasyńdar. Otan aldyndaǵy boryshtaryńdy adal atqaryńdar. Saparlaryń sátti bolsyn! – dedi balalardyń ákesi Qadyrǵalı Mádıev.
Ol sondaı-aq barlyq áskerge shaqyrylýshylardyń aldaǵy qyzmetine tabys tiledi.
