Mańǵystaý oblysy týý kórsetkishi boıynsha respýblıkada kósh bastap tur

AQTAÝ. QazAqparat - Mańǵystaý oblysy týý men tabıǵı ósim kórsetkishi boıynsha respýblıkada aldyńǵy qatarda. Ótken jyly óńirde 23 229 sábı dúnıege keldi. Al bıyl jyl basynan beri 5200 áıel bosanǵan, dep habarlaıdy QazAqparat.

Bul týraly oblystyq qoǵamdyq kommýnıkatsııa ortalyǵynda ótken brıfıngide Mańǵystaý oblystyq «Ana men bala» ortalyǵynyń dırektory Japyraq Epenova málim etti.

- Oblys boıynsha 8 akýsherlik statsıonarda kómek kórsetiledi. Onyń bireýi oblystyq perınataldyq ortalyǵy - úshinshi deńgeıli kómek kórsetý orny. Jańaózen men Aqtaý qalalyq perzenthanasy - ekinshi deńgeıli kómek kórsetý orny. Sondaı-aq 5 akýsherlik statsıonar bar. Olar Túpqaraǵan, Qaraqııa, Mańǵystaý, Beıneý aýdany men Jetibaı aýylynda ornalasqan. Sanavıatsııamen 20 náresteni respýblıkalyq medıtsınalyq kómek kórsetý ortalyqtaryna jiberdik, - deıdi Japyraq Epenova.

Spıkerdiń aıtýynsha óńirde kadr tapshylyǵy bar. Oblys 85 paıyz akýsher gınekologtarmen, 84 paıyz reanımatologtarmen, 65 paıyz dáriger-neanatologtarmen, 100 paıyz orta býyn qyzmetkerlerimen qamtylǵan.

-Bizdiń oblystyq perınataldyq ortalyqta da neonataldy ota, ıaǵnı jas sábılerdiń ishki qurylysyna ota jasalady. Máselen, 2021 jyly 21 balaǵa kómek kórsetildi. Bıyldyń ózinde 2 ota jasalyp, sátti aıaqtaldy. 2020 jyldyń aqpan aıynan bastap Mańǵystaý oblysynda medıtsınalyq jetistikterdiń biri - ınvazıvtik dıagnostıka. Bul - óte kúrdeli dıagnostıkalyq zertteý. Máselen, balanyń qaǵanaq sýy alyp, zertteledi. Ol sırek kezdesetin aýrýlarǵa kúmán bolǵan jaǵdaıda nemese hromosomdyq patologııaǵa kúmán bolǵan jaǵdaıda tekseriledi. Bıyl 2022 jyly pılottyq joba boıynsha zertteý bastaldy. 3 aı ishinde biz 2 balanyń analızin molekýlarlyq medıtsına ortalyǵyna jiberdik, - dedi Japyraq Epenova.