Mańǵystaý oblysy eńbek daýy boıynsha kósh bastap tur
ASTANA. QazAqparat - Mańǵystaý oblysy eńbek daýy boıynsha kósh bastap tur. Bul týraly QR Eńbek jáne halyqty áleýmettik qorǵaý mınıstri Tamara Dúısenova málim etti.
«Jyl basynan beri respýblıkada 10 eńbek daýy tirkelgen. Onyń ishinde Mańǵystaý oblysynda - 4, Astana qalasy, ShQO, SQO, OQO, Almaty men Atyraý oblystarynda bir-birden oryn alǵan. Olar negizinen jumyskerlerdiń jalaqy deńgeıin joǵarylatý talaptaryn qoıý jáne eńbekaqyny ýaqytynda ótemeý saldarynan bolyp jatady», - dedi mınıstr QR Premer-Mınıstriniń birinshi orynbasary Baqytjan Saǵyntaevtyń tóraǵalyǵymen ótken áleýmettik seriktestik, áleýmettik jáne eńbek daýlaryn retteý respýblıkalyq komıssııasynyń otyrysynda.
Eńbek mınıstrliginiń málimetteri boıynsha, eńbek daýlarynyń barlyǵy memlekettik organdardyń jedel iske aralasýynyń arqasynda der kezinde sheshilgen. Aqpan-shilde aılaryndaǵy jalaqy qaryzy 3 esege azaıyp, 253 mln. teńge kóleminde qaldy.
Otyrys barysynda QR Úkimeti jáne Jumyskerler men jumys berýshilerdiń respýblıkalyq birlestigi arasynda 2015-2017 jyldarǵa arnalǵan kelisimniń jobasy qaraldy.
Jıyn qorytyndysyn shyǵarǵan B. Saǵyntaev seriktestik qarym-qatynastary salasynda jumyskerler men kásipkerlerdiń quqyqtyq jáne mádenı deńgeıin joǵarylatý máselesin qolǵa alý kerektigin erekshe atap ótti. Sondaı-aq eńbekshilerdiń jalaqy qaryzdaryn óteý máselesin odan ári belsendi júrgizýdi tapsyrdy.
