Mańǵystaý oblysy elordaǵa balyqtyń baǵaly túrlerin, sonyń ishinde bekire tuqymdastaryn ákeldi - oblys ákimi
ASTANA. 9 qarasha. QazAqparat - Mańǵystaý oblysy elordadaǵy aýylsharýashylyq jármeńkesine balyqtyń baǵaly túrlerin,
sonyń ishinde bekire tuqymdy balyqtardy ákeldi. Bul týraly búgin Astana qalasynyń Ortalyq alańynda ótip jatqan aýylsharýashylyq jármeńkesiniń ashylýynda Mańǵystaý oblysynyń ákimi Alık Aıdarbaev málim etti.
«Búgingi jármeńkege ózimizdiń eń basty baılyǵymyzdy - baǵaly balyqtardyń birneshe túrlerin ákeldik, sonyń ishinde bekire tuqymdas balyqtar da bar. Munda usynǵan taǵy bir baılyǵymyz - bul ataqty mańǵystaýlyq shubat. Sonymen qatar biz elorda bazarlarynda kezdese bermeıtin túıe etin jetkizip otyrmyz. Jalpy atalǵan jármeńkege Mańǵystaý óńirinen quny 50 mln. teńge bolatyn 60 tonna azyq-túlik ákelindi», - deıdi A.Aıdarbaev.
Aıta keteıik, búgin Astana qalasynyń Ortalyq alańynda Mańǵystaý jáne Aqtóbe oblystarynyń aýylsharýashylyq jármeńkeleri ashyldy. Aqtóbe oblysynan jármeńkege 12 aýdannyń jáne Aqtóbe qalasynyń kásipkerleri qatysýda. Olar Astanaǵa 130 tonna ónim jetkizdi, onyń ishinde 50 tonna et, 12 tonna balyq, 35 tonna kartop pen kókónis, 2 tonna sút taǵamdary, 5 tonna ósimdik maıy, 3 tonna shujyq ónimderi, 5 myń dana jumyrtqa jáne 20 tonna basqa da ónimder bar.
