Mańǵystaý oblysy ákiminiń orynbasary Ystambuldaǵy teraktige baılanysty kóńil aıtty
ASTANA. QazAqparat - Búgin Mańǵystaý oblysy ákiminiń orynbasary Ánýar Shójeǵulov Aqtaý qalasyndaǵy Túrkııa Respýblıkasynyń Bas konsýldyǵyna bardy, dep habarlaıdy oblys ákiminiń baspasóz qyzmeti.
Ánýar Shójeǵulov Ystambul qalasynda oryn alǵan terrorlyq áreketke baılanysty «Kóńil aıtý kitapshasyna» aımaq basshysynyń jáne Mańǵystaý oblysy turǵyndarynyń atynan qaza bolǵandardyń otbasylaryna jáne jaqyndaryna kóńil aıtyp, zardap shekkenderdiń tezirek saýyǵyp ketýine tilektestik bildirdi.
«Ystambulda bolǵan lańkestik áreketterdiń saldarynan qurban bolǵan jazyqsyz azamattardyń qazasyna qaıǵyrýdamyz. Qurban bolǵandardyń týǵan-týystary men jaqyndaryna, Mańǵystaý oblysy ákiminiń jáne turǵyndarynyń atynan kóńil aıtamyn», - dedi ol.
