Mańǵystaý oblysy ákiminiń birinshi orynbasaryna sógis jarııalandy

AQTAÝ. QazAqparat - Mańǵystaý oblysynyń birqatar laýazymdy tulǵalaryna «Nur Otan» partııasynyń jol kartasyn tıisti deıńgeıde júzege asyrmaǵany úshin sógis jarıalandy, dep habarlaıdy QazAqpara tilshisi.

Mańǵystaý oblysynyń ákimi, «Nur Otan» partııasy Mańǵystaý oblystyq fılıaly Saıası keńesiniń múshesi Nurlan Noǵaevtyń tóraǵalyǵymen partııanyń oblystyq fılıalynda Saıası Keńes Bıýrosynyń otyrysy ótti. Otyrys qorytyndysy boıynsha oblys ákiminiń birinshi orynbasary men birqatar aýdan ákimderine sógis túrindegi partııalyq jaza jarııalandy.

Kún tártibinde «Nur Otan» partııasynyń «Mańǵystaý oblysynyń 2021-2025 jyldarǵa arnalǵan «Ózgerister joly: ár azamatqa laıyqty ómir!» saılaýaldy baǵdarlamasyn iske asyrý jónindegi is-sharalar jospary qaraldy. Josparǵa áleýmettik nysandardyń qurylysy, jol ınfraqurylymy, halyqty jumyspen qamtý, shaǵyn jáne orta bıznesti damytý jáne t.b.112 shara engizilgen. Atalǵan jobalardyń tolyq jáne merziminde oryndalýy óńirdiń áleýmettik-ekonomıkalyq damýyna oń áser etpek.

Otyrysta aýdan ákimderi men oblystyq basqarma basshylary tyńdaldy.

Saıası Keńesi Bıýro otyrysynda bekitilgen jol kartasynyń Mańǵystaý oblysy boıynsha saılaýaldy mindettemelerin oryndaý aıasynda «Nur Otan» partııasynyń oblystyq, qalalyq, aýdandyq saılaýaldy baǵdarlamalaryna júıeli monıtorıng uıymdastyrylǵan. Oblysta jáne aýdandar men qalalarda arnaıy shtab qurylyp, jumys isteýde.

Jalpy alǵanda, osy jyldyń 8 aıynda óńirlik jáne aýmaqtyq saılaýaldy baǵdarlamalaryna júrgizilgen taldaý nátıjesinde barlyǵy 112 is-sharanyń 41-i oryndaldy, 6-y oryndalý satysynda, altaýynyń oryndalmaý qaýpi bar, 4-i aýystyrýdy qajet etedi.

- Bul jumystarǵa memlekettik organ basshylary jaýapty. Halyq bizden jol kartasyn sapaly júzege asyrýdy kútedi, sondyqtan biz ózimizge artylǵan senimdi aqtaýǵa mindettimiz. Jospardyń oryndalmaýy ákimder men basqarma basshylary arasynda ishki baılanystyń joqtyǵyn kórsetip tur. Bul iske degen júıeli jumystyń joqtyǵy. Bárimiz bir baǵytta jumys isteýimiz kerek. Sonda ǵana aldymyzǵa qoıylǵan mindetterdi oryndap, óz múmkindikterimizdi tıimdi paıdalanatyn bolamyz,-dedi Nurlan Noǵaev.

Otyrys qorytyndysy boıynsha Mańǵystaý oblysy ákiminiń birinshi orynbasaryna, Qaraqııa jáne Beıneý aýdandarynyń ákimderine «Nur Otan» partııasynyń jol kartasyn durys baqylamaǵany jáne tıisinshe oryndamaǵany úshin sógis túrinde partııalyq jaza berildi.

Nurlan Noǵaev jaýapty tulǵalarǵa ózderine júktelgen mindetterdi merziminde oryndaýdy tapsyrdy.