Mańǵystaý oblystyq teri-venerologııalyq dıspanseri memleketke qaıtaryldy - Bas prokýratýra

ASTANA. QazAqparat – Mańǵystaý oblysynda densaýlyq saqtaý nysany jáne elordada Ǵylym qorynan ǵylymı-tehnıkalyq qyzmet nátıjelerin kommertsııalandyrýǵa bólingen grant qarajaty keri qaıtaryldy, dep habarlaıdy QazAqparat Bas prokýratýraǵa silteme jasap.

Mańǵystaý oblysynyń prokýrorlary baǵalaý quny 145 mln teńgeden asatyn «Mańǵystaý oblystyq teri-venerologııalyq dıspanseri» kommýnaldyq kásipornyn memleketke qaıtardy. Buǵan deıin kásiporyn Úkimettiń Densaýlyq saqtaý obektilerin memleket ıeliginen shyǵarýǵa salynǵan tıymyna qaramastan, keıinnen satyp alý quqyǵymen 5 jyl merzimge «Qaraqııa ońaltý ortalyǵy» jaýapkershiligi shekteýli seriktestigine senimgerlik basqarýǵa berilgen bolatyn. Búgingi tańda senimgerlik basqarýǵa berý sharty buzylyp, múlik qaıtadan memlekettiń basqarýyna qaıtaryldy.

Al, elordalyq prokýratýra memleket granttar túrinde bólgen aqshany qaıtarý jóninde sharalar qabyldady. Máselen, Ǵylym qory 2017-2019 jyldar aralyǵynda «Flow System» jaýapkershiligi shekteýli seriktestigine ǵylymı-tehnıkalyq qyzmet nátıjelerin kommertsııalandyrýǵa 259 mln teńge somasynda grant bergen. Alaıda, grant alýshy Ǵylym qory aldyndaǵy mindettemelerin oryndamaı, jobany iske asyrmaǵan. Osyǵan baılanysty prokýratýra sotqa talap aryz engizdi. Nátıjesinde sot jaýapkerden memleket paıdasyna 259 mln teńge óndirdi.