Mańǵystaý oblystyq densaýlyq saqtaý basqarmasynyń jetekshisi jaýapqa tartyldy
AQTAÝ. QazAqparat - Mańǵystaý oblystyq densaýlyq saqtaý basqarmasynyń jetekshisi jaýapqa tartyldy. Sheneýnik Ádep kodeksin buzǵan. Bul týraly Memlekettik qyzmet isteri jáne sybaılas jemqorlyqqa qarsy kúres agenttiginiń Mańǵystaý oblysy boıynsha, departamentiniń baspasóz qyzmeti habarlady, dep jazady lada.kz.
Baspasóz málimetterine qaraǵanda, oblystyq Ádep jónindegi keńes Mańǵystaý oblystyq densaýlyq saqtaý basqarmasynyń jetekshisin «atqaryp otyrǵan laýazymyna tolyq sáıkessizdigi týraly» tártiptik jaýapqa tartý jóninde usynys engizdi.
«Tekserý barysynda basqarma basshysy orynbasarynyń basqarma jetekshisiniń ruqsatynsyz eki kún boıy jumysta bolmaǵandyǵy anyqtaldy. Ol jetekshiniń atyna ózi qol qoımastan eńbek demalysynan qalǵan kúnderdiń esebinen eki kúnge aqysyz demalysqa jiberý jóninde ótinish qaldyryp ketken. Sheneýniktiń ózi jetekshiden aýyzsha ruqsat alǵanyn aıtady»,- dep habarlady vedomstvonyń baspasóz qyzmeti.
Alaıda, basqarma jetekshisi óziniń qyzmetkeriniń sózin rastamady.
«Memlekettiń qyzmetshiniń ótinishiniń qaralǵan-qaralmaǵanyna kóz jetkizbesten jumys ornyn tastap ketý Ádep Kodeksiniń 5 tarmaǵynyń 11 tarmaqshasynyń buzylǵanyn kórsetedi. Al bul baptarda qyzmet tártibin múltiksiz oryndaý, óz qyzmetine qatysty mindetterdi erikti túrde, adal, sapaly oryndaý, óziniń jumys ýaqytyn barynsha tıimdi paıdalaný qajettigi aıtylǵan»,-delingen Memlekettik qyzmet isteri agenttiginiń Mańǵystaý oblysy boıynsha departamentiniń habarlamasynda.
