Mańǵystaý oblystyq aýrýhanasyndaǵy órttiń qalaı shyqqany belgili boldy

AQTAÝ. QazAqparat - Keshe Mańǵystaý oblystyq aýrýhanasynyń qabyldaý bóliminde órt shyqty. Oqys oqıǵa shamamen 23 saǵat 30 mınýtta bolǵan, dep habarlaıdy QazAqparat tilshisi.

Oblystyq densaýlyq saqtaý basqarmasynyń baspasóz qyzmetiniń habarlaýynsha, órttiń shyǵýyna elektr symynyń qysqa tuıyqtalýy sebep bolýy múmkin.

«Bul órtti sóndirýshiler kelgenge deıin aýrýhana qyzmetkerleri óshirýge tyrysqan. Oqıǵa barysynda medıtsına qyzmetkerleri men patsıentterdiń eshqaısysy zardap shekken joq.

Mańǵystaý oblystyq aýrýhanasy shtattyq rejımde jumysyn jalǵastyrýda. Naýqastardy basqa bloktarǵa aýystyrý josparlanyp otyrǵan joq», - delingen Mańǵystaý oblysynyń Densaýlyq saqtaý basqarmasynyń baspasóz qyzmeti taratqan habarlamada.

Eske sala ketsek, polıtsııa qyzmetkerleri Mańǵystaý oblystyq aýrýhanasynyń qabyldaý bólimindegi órtti sóndirip, ishtegi naýqastardy syrtqa shyǵarýǵa kómektesken.