Mańǵystaý oblystyq aýrýhanasy kópbeıindi provızorlyq statsıonarǵa aýysty

AQTAÝ. QazAqparat - Mańǵystaý oblystyq aýrýhanasy kópbeıindi provızorlyq statsıonarǵa aýysty. Mundaı sheshim Mańǵystaý oblysy boıynsha koronavırýs ınfektsııasynyń taralýyna jol bermeý jónindegi óńirlik jedel shtabtyń otyrysynda qabyldandy, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń habarlaýynsha, budan bylaı oblystyq aýrýhana Covid-19 dıagnozymen aýyrǵan naýqastardy ǵana emdeýmen aınalysady.

Óńirdiń barlyq basqa medıtsınalyq mekemelerine tegin medıtsınalyq kómektiń kepildendirilgen kólemi (TMKKK) jáne mindetti áleýmettik medıtsınalyq saqtandyrý (MÁMS) sheńberinde sapaly medıtsınalyq kómek kórsetýdi jalǵastyrý týraly tapsyrmalar berildi. Azamattar turǵylyqty jeri boıynsha tirkeýge qaramastan medıtsınalyq kómek alýyna bolady.

Epıdemıologııalyq jaǵdaı burynǵy qalpyna kelgen soń, oblystyq aýrýhana burynǵysha naýqastardy qabyldaýdy jalǵastyratyn bolady, ıaǵnı shuǵyl jáne josparly operatsııalar burynǵysha jasalady.

Ázirge josparly otalar jasalmaıdy, al naýqastarǵa shuǵyl medıtsınalyq kómek kelesi medıtsınalyq uıymdarda kórsetiledi:

1). «Sofie Medgroup» medıtsına ortalyǵynda travmatologııa, neırohırýrgııa jáne ınsýlt.

2). «Archımed» medıtsınalyq ortalyǵynda kardıologııa, hırýrgııa jáne onkologııa.

3). «ıAsın» medıtsınalyq ortalyǵyndaǵy terapııa.

4). «Neıron» medıtsınalyq ortalyǵynda LOR jáne oftalmologııa.