Mańǵystaý men Atyraýdaǵy memlekettik qyzmette jemqorlyq kórsetkishi nege joǵary
"Atalǵan aımaqtarda adamdardyń memlekettik qyzmetten jıi ketýi baıqalady. Sebebi jalaqynyń mólsheri tym az. Al munaı-gaz salasynda eńbekaqynyń kólemi kóp bolǵannan keıin xalyq memlekettik qyzmetke qatty qyzyqpaıdy. Barǵan kúnniń ózinde ekijaqty jalaqynyń aıyrmashylyǵyn basqa joldarmen "teńestirýge" tyrysady. Birinshiden, Mańǵystaý men Atyraý oblystarynda memlekettik qyzmetke degen xalyqtyń senimi tómen bolyp tur. Sosyn biz saýalnama júrgizgende, "Memlekettik qyzmetti alǵany úshin para bergen kezińiz boldy ma?" dep naqty suraq qoıdyq. Sonda adamdar anyq jaýap berdi. Ekinshiden, búginde respýblıka boıynsha jemqorlyqtyń kórsetkishi 3-4 paıyz bolsa, Mańǵystaý men Atyraý oblystarynda ol kórsetkish 11 paıyzǵa deıin jetedi", - dedi ortalyq dırektory Janar Jandosova QazAqparat tilshisine bergen suxbatynda. Onyń aıtýynsha, osy aımaqtarda memlekettik qyzmet pen munaı sektoryndaǵy jalaqylardyń ár túrli bolýy jemqorlyqqa túrtki bolyp otyr.
Aıta ketken jón, atalǵan saýalnama Memlekettik kirister komıtetiniń Jumys sapasyn anyqtaý maqsatynda uıymdastyrylǵan bolatyn. Osy oraıda "Sandj" zertteý ortalyǵynyń basshysy komıtettiń óz jumysyn baǵalaý salasyndaǵy qyzmetine joǵary baǵa berip otyr. Sebebi dál osy organ - qyzmet sapasyn baǵalap otyratyn jalǵyz memlekettik mekeme. "Sosyn progress te anyq baıqalyp otyr. Óıtkeni komıtet jyl saıyn óziniń jumys sapasyn tekserip otyrady. Endi, bıyl osy kórsetkish sál tómendep qaldy. Degenmen, bul jumystyń nasharlaǵany emes, kerisinshe, olar úzdik qyzmet túrlerin ysyryp tastap, problemalyq qyzmettermen jumys jasap jatyr. Sonyń saldarynan xalyqtyń qyzmet sapasyna degen qanaǵattaný kórsetkishi sál tómendep otyr. Eń bastysy, osy saladaǵy jumys toqtap turǵan joq. Máselen, osydan birneshe jyl buryn kásiporyndy jabý qyzmetiniń mashaqaty kóp bolatyn. Jemqorlyq áreketteri de shash-etekten edi. Qazir ol eń úzdik qyzmet bolyp sanalady", - dep atap kórsetti Jandosova.
