Mańǵystaý mektepterine jańa oqý jylynda 300-ge jýyq jas muǵalim keledi
AQTAÝ. QazAqparat - Mańǵystaýda 1-synypqa qabyldaýǵa 20 myńǵa jýyq ótinish túsken. Bul týraly oblystyq qoǵamdyq kommýnıkatsııa ortalyǵynda ótken brıfıngte oblystyq bilim basqarmasy basshysynyń orynbasary Gúlmıra Mamaeva málim etti.
Spıkerdiń aıtýynsha, bıyl mektepterdiń birinshi synybyna 19530 oqýshy qabyldaý josparlanǵan.
- 8 tamyzdaǵy jaǵdaıyna ata-analardan 19 660 ótinish qabyldandy. Jalpy oqýshy kontıngenti byltyrmen salystyrǵanda 8 myń oqýshyǵa artyp, 175 myń oqýshyny quraıdy dep boljandy,-dedi G. Mamaeva.
Jalpy, Gúlmıra Qasymqyzy 2022-2023 jańa oqý jylyna daıyndyq barysy týraly baıandady.
Onyń aıtýynsha, bıyl 300-ge jýyq jas maman keledi.
Oǵan qosa, QR Oqý-aǵartý mınıstrliginiń Mańǵystaý oblysyna úzdik pedagogtartardy tartýǵa arnalǵan baǵdarlamasyna sáıkes úzdik muǵalimder kelmek.
Óńir boıynsha kúndizgi memlekettik mektepterde 15 myńnan astam muǵalim jumys jasap júr.
