Mańǵystaý mektepterinde esirtkige táýeldi balalardy anyqtaý úshin narkobeket ashyldy

AQTAÝ. QazAqparat - Mańǵystaýdaǵy bilim mekemelerinde narkobeketter ashyldy. Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblystyq bilim basqarmasy adamgershilik-rýhanı tárbıe jáne ózin-ózi taný bólimi basshysynyń mindetin atqarýshy Oryngúl Mamýtova málim etti, dep habarlaıdy QazAqparat.

Onyń aıtýynsha, narkobeketterdiń quramynda mektep basshysy, tárbıe jónindegi orynbasary, mektep ınspektory, psıholog, áleýmettik pedagog, synyp jetekshi bar.

- Narkobeketterdiń maqsaty - bilim uıymdaryndaǵy esirtki zattarǵa táýeldi jáne narkologııalyq dıspanserde esepte turǵan oqýshylarmen jumys, aldyn alý sharalaryn júrgizý. Búgingi tańda narkologııalyq dıspanserde esepte turǵan oqýshy joq, - dedi Oryngúl Mamýtova.

Sondaı-aq, brıfıngte Mańǵystaý oblystyq polıtsııa departamenti esirtki qylmysyna qarsy is-qımyl basqarmasynyń bastyǵy Edýard Qýanaev sóz aldy.

Onyń aıtýynsha, esirtki bıznesiniń barlyq qylmystyq is-áreketiniń basty býyndarynyń biri - jastardy ınternet-resýrstary arqyly esirtki medıasyna tartý.

- Ol jasyryn sıpatqa ıe jáne hat almasý jolymen kelisiletin ýaǵdalastyq (Telegram, Vipoil qosymshalarynda), tólem júıeleri boıynsha qolma-qol aqshasyz tásilmen, bank kartochka shotyna elektrondy aqshamen («bıtkoın» jáne basqa túrleri) aýdarý arqyly júzege asyrylady. Bul rette, jedel shara barysynda «Nıkneım» (esirtki satatyn ınternet toby nemese dúken) ornatý jáne ony «mobıldi nómirge» baılanystyrý tehnıkalyq turǵydan múmkin emes. Osyǵan baılanysty qylmyskerdiń derekterin jáne onyń ornalasqan jerin anyqtaý qıynǵa soǵady, - dedi Edýard Qýanaev.

Ashyq kózderden alynǵan foto