Mańǵystaý mektepterinde «5, 4, 3» degen dástúrli baǵa qoıylmaıdy
ASTANA. QazAqparat - Mańǵystaýda 1, 2, 5, 7-synyp oqýshylary qyrkúıekten bastap jańartylǵan baǵdarlamamen oqıdy. Endi atalǵan synyptarda «5, 4, 3» degen baǵa bolmaıdy, onyń ornyna «maqsatqa jetti», «maqsatyna talpynyp jatyr», «qanaǵattandyrarlyq» degen sekildi baǵalaý júıesi engizilmek. Bul týraly búgin Aqtaýdaǵy Nazarbaev Zııatkerlik mektebinde ótken tamyz konferentsııasynda aıtyldy.
Konferentsııada NZM ustazdary oblys muǵalimderine baǵalaý júıesiniń jańa tártibi týraly tájirıbelik sabaq ótkizdi. NZM dırektorynyń kásiptik synama jónindegi orynbasary Rınat Jumabaevtyń aıtýynsha, jańa baǵalaý júıesi balalardyń oqýǵa yntasyn arttyrady.
«Ázirge orta mektepter ishinen 1, 2, 5, 7- synyp oqýshylary arnaıy tańdalyp otyr. 2019 jylǵa deıin mekteptegi barlyq synyptar osy baǵalaý júıesine kóshedi», - deıdi ol.
Jańa baǵalaý júıesi týraly NZM dırektory Ermek Paızov keńirek túsindirdi.
«Synı baǵalaý júıesi 2-ge bólinedi: sabaq ústindegi qorytyndy baǵalaý jáne toqsan boıynsha jıyntyq baǵalaý. Qorytyndy baǵalaý - bul kúndelikti synyp jumysy barysyndaǵy baǵalaý. Baǵa oqýshylarǵa sandyq belgi retinde emes, oqýshylardyń jumysyna usynystar retinde beriledi: ne jaqsy isteldi, qaı jerde qate jiberildi, ony qalaı túzetý kerek. Muǵalimniń baǵalaý usynystary balanyń oqytý sapasyn jaqsartýǵa múmkindik beredi, oqýshynyń oqý kózqarasyna jaǵymdy áser etedi. Jıyntyq baǵalaý - oqý baǵdarlamasyna sáıkes bólimderdi oqýdan keıin nemese belgili oqý kezeńi (toqsan, oqý jyly) aıaqtalǵanda júrgiziletin baǵalaýdyń jınaqtaýshy túri», - dedi ol.
Sondaı-aq tilderdi oqytý barysynda «tyńdalym», «aıtylym», «oqylym» jáne «jazylym» sııaqty ádisterdi qatar qoldanady.
Aıgúl Dáden
