Mańǵystaý-Qulsary baǵytyna jańa poıyz shyqty

AQTAÝ. QazAqparat - Mańǵystaý-Qulsary baǵytyna jańa poıyz qatynaı bastady, dep habarlaıdy QazAqparat tilshisi.

Kópshiliktiń suraýy boıynsha alǵashqy reıspen alty vagon attandy. Atyraý oblysyndaǵy Qulsary qalasyna deıin baratyn alǵashqy jolaýshylardy temirjol ýchaskesiniń qyzmetkerleri saltanatpen shyǵaryp saldy.

Jańa baǵyttaǵy poıyz araǵa kún salyp, taq kúnderi júredi.  Dittegen jerge 14 saǵatta  jetkizedi. Ázirge vagondar sany altaý bolǵanymen jazda olardyń sany arta túspek.

Alǵashqy jolaýshylardy shyǵaryp salǵan ýchaske basshylary qyzyl lenta qıdy.

«Mańǵystaý» ýchaskesiniń basshysy Batyrbek Shyrynbaevtyń aıtýynsha,  jańa baǵyttyń ashylýyna jolaýshylar suranysy sebep bolǵan. Ásirese, óńirden Qulsaryǵa qatynaıtyn jumysshylar kóp eken. Sondyqtan osy baǵdar iske qosylǵan.